2 KORINTH 6 - DARA GADAIN N.T. with PSA and PRO (BSI)

¹ Madai ni khasaoma nisi maiyaba khe, lab jayahi nisi dongya mani khlai hi, jing jangbo dang pha laiyarao nisi khe jing khainsu du.

² Bede thikhade, bo thi du, Ang nangjaoyaba bubli ha ang nini grao khe khna hi, Sogoma ni basain ha ning khe ang juru ba, Nai lah, duha Madai nangjaoyaba gibi bubli se; nai lah, duha sogo mani basain se.

Paul dukhu hadi goronyaba

³ Jing khusi dangyaba khe subung buthu hamya thiphuya mani khlai hi, asaba lama habo gaso susobo khlaiya.

⁴ Bokhe gar hi Madai ni khusi dangyasa ja ba lai ning jing khusi dangyaba si ha subung ni muh ha galaijao hi jing dong re. Dukhu rijaoyaba ha ja thing, do jaoyaba su jaoyaba ha ja thing, khah lao hi jing dukhu khlai hi,

⁵ sujaoyaba buthu ha ja thing, phatho buthu ha ja thing, subung buthu ni yao jang dukhu rijaoyaba ha ja thing, khusi ni gaso suso buthu ha ja thing, nai matho buthu ha ja thing, hukri jaoyaba buthu ha ja thing,

⁶ gathar ni balam ha ja thing, maigru gru ni balam ha ja thing, Bese Gathar odehe hamjaoma gibi ni grao gibi thiyaba balam ha ja thing;

⁷ yaoda yaosi gede dormo ni yaodi buthu khe yaowai hi Madai khusi dangyaba raothai ni grao gibi thiyaba balam ha ja thing;

⁸ sugu jaoyaba odehe lahi phnu jaoyaba ni gejer ha ja thing, bumu hamba hamya ni gejer ha ja thing, thokhiyaba jang gain rijao hi gibi jang jing dong ba;

⁹ jing malai jang mithi jaoyaba bo niya, bumu dak jayaba jahi, githi lai jahi, nai lah, jing thang hi ning dong, sthai jaoya hi, jing saja rijao ba,

¹⁰ khaja hi jing dong ba ha, khah waimu mai ba, dukhisa jahi jing dong ba ha, gabang subung khe gnang khlai ba, musibo niya hi, jamthar si jini gaja ja kha.

¹¹ Nisi Korinth ni subung buthu, khah khuru hi, nisi niha hamsisi grao sainlai ba, jini khasu ha ar khurudao ba.

¹² Nisi khe jing wainsoyaba khe de jing laphin laya, thikhabo, nisi ni khah de jini gede khah khuru ruya.

¹³ Nanarao niha grao thiba lai, nisi khe ang thihi nang, boha nisibo jing lai ning khah khuru pha lah.

Nisi Madai gathang ni bikhoh se

¹⁴ Lonyayarao jang baosi jahi jowal da yaowai pha lai. Dormo jang dormo niyayaba la snadi masi jayaba dong ba? Niyakha la, andar jang jnama bonsi masi japhu du?

¹⁵ Krista jang Beliar bo snadi milima dong? Niyakha la, lonyaba jang lonyayaba la bonsi snadi phantha yaowai pha laiyaba dong?

¹⁶ Madai ni bikhoh jang saokhuli buthu la khah masi snadi masi jayaba dong? Jing de Madai gathang ni bikhoh se! Madai ning, Bonsi ni ha ang dong nang, bonsi ni bising ha daobai ma se; Bonsi ni Madai ang ja nang, bonsibo ani subung buthu ja ma se, thihi bo thiba lai jasosi.

¹⁷ Odebani, bonsi ni bising ni phrang baigo buhi, gibin dong lah, Gabra odehe thi du; Jinis gusu musi khebo da dopha lah, Odese, nisi khe ang khaja ma,

¹⁸ Nisi ni khlai hi ang Bupha ja nang, Nisi bo anthane khlai hi, basa bisik ja nang, Gabra khrip raothai gnang odehe thi du.