2 KORINTH 11 - DARA GADAIN N.T. with PSA and PRO (BSI)

Paul jang mosol haijaoyarao

¹ Jini gibir jathai ni basao ha nisi khah laoma ni ang nangjao du. Ja du, blaiya si khah lao lah.

² Miyah saosi, Krista khe ang nisi ne deng ri kha, boni ha mala gathar lai nisi khe yaopha phu mani khlai hi, Madai ni hingsa jang ang nisi khe hingsa khlai du.

³ Bede thikhala, jbu giriklaidao thaoyaba Evi khe bo thokhi ba lai ning, Krista ni gede ha nisi ni khah gathar ode gibiyaba khe bonsi nisi khe hamya khlaijao nang thihi ang khin du.

⁴ Subung gejesi phai hi, jing thiba niya hi gibin Jisu khe thi ba. Bese nisi maiyaba khe niya hi, gibin bese maiyaba jang hamba graojma nisi ajaoyaba khe niya hi, bo gibin lailo lo nisi haglai mani ba na!

⁵ Oleiyaba Haijaoyasa gedeba nisi thiyaba buthu de asaba balam habo ang soya thihi baoya.

⁶ Grao thiba ang ringya la khabo bujima gede ha de ang olei niya thihi nisi khrip jadi ha ragaosisi ang phnu ri kha.

⁷ Ode niyakha la, bo magna Madai ni hamba graojma ang thiba, nisi sugujao hi dongphu mani khlai hi jar khe jar bakhla ha galai ba la jing phap khlai ba na somo?

⁸ Ang nisi ni khusi khe dangphu mani khlai hi, bonsi ni phrang yaowai lahi, longjom gibin buthu ni rang khe ang jam ri ba.

⁹ Ode, nisi niha ang dongba ha baojo khali, saosi ni basao ha bubain riya; Makedonia raji ni phrang daphlung phaiyarao se, ang baojo ba ha dukhu hor juru pha ri ba; khrip jadi ha nisi masi yaowai phalaiya mani khlai hi jing slam kha, olei jasosi ning ang slam ma se.

¹⁰ Krista ni grao gibi de ani ha dong bani khlai hi, Akaia raji khonglang ha ang sanggayaba khe mathao nang niya.

¹¹ Snadi jabani? Nisi khe ang khasaoya bani na? Nisi khe ang khasao du thihi Madai ning tharmai du.

¹² Jing dangba lai jasosi dang khali nisi thima nangjaoyaba buthu sangga mani musi khebo bonsi maiyaba ni khlai hi, ang dangba lai ning ang de dangpha lang ma se.

¹³ Oleiyaba subung buthu de haijaoyasa mosol, dangyasa subung khe thokhi baiyaba, Krista ni haijaoyasa lai jar slam layarao se.

¹⁴ Bokhe gmang ma nangya, Soithan bo jar khe jnama ni sorgo degla ha slam la ba se thi.

¹⁵ Odebani, Soithan ni khusi dangyarao de dormo ni khusi dangyarao lai slamyaba khe gmang ma niya. Bonsi jamthao ba ha de bonsi dangba lai ning bonsi ja la ma se.

Haijaoyasa ja bani Paul ni dukhu buthu

¹⁶ Ang phin thiphin du, asaba bo ang khe gibir da bao thing, thikhabo nisi ang khe bao khade, ang gijisa sangga phu mani khlai hi, gibir lai ang khe nai lah.

¹⁷ Ang grao joyaba de Gabra ni hukhum jang ang joya, ani sanggama lon bani khlai hi, gibir lai se ang grao thi ba.

¹⁸ Gabang subung de saomang gibi jang bonsi sangga re, angbo sangga pha ma se.

¹⁹ Nisi de, girik bani, subung gibirrao khebo khajama jang nisi gong ba ring du.

²⁰ Malai jang leng ha nisi khe slam ba ja thing, nisi jithar jaoba ja thing, jarni lab ni khlai hi yaowai jaoba ha ja thing, nisi khe naisleba ha ja thing, nisi bakho lai rijaoba ha ja thing, bo buthu habo nisi gongpha lang phu du.

²¹ Olei jing dang raoya khade ang lasisiyaba grao se. Bede thikhade, asaba jinis habo sangga rao mani dong khade gibir lai ang thi ha du, bo jinis hade ang bo sangga rao du.

²² Hebrai jadi se na? Angbo Hebrai se. Israel jadi se na? Angbo Israel jadi se. Abraham ni greng rao se na? Angbo Abraham ni greng se.

²³ Krista ni dangyasarao se na? Gibir lai ang thi du, ang de ar dukhu hadi jadao kho; phatho habo gabang jepjao hi, gabang sujaoba bo sujao kha, thihma jasibo ang goron kha.

²⁴ Ang de Judarao ni yao ni phrang alang bowa phinjang bisagin jadi di ang sujao kha.

²⁵ Goda jang alang tham ang sujao kha; ode alang si de ang longthai jang lemjao kha; rung hamya jayaba ha alang tham ang goron kha; alang side sainsi horsi sagor ha ang dong ba.

²⁶ Ang alang alang mophosol thangyaba buthu ha, dikhong buthu ha khinthao thaoyaba ha, makhao jang khin thaoyaba ni gejer ha, ani greng buthu ni khinthao thaoyaba ha, Jentailrao ni bising ha khinthao thaoyaba ha, nogor ni khinthao thaoyaba ni bising ha, hajengling khinthao thaoyaba ha, sagor khinthao thoyaba ha, daphlung mosol buthu ni bising ha khinthao thaoyaba ha ang alang alang goron ba.

²⁷ Thu phuya si dukhu jang lengyaba buthu ha, mai jiya hukhri jao hi, ode dih gangha hi ang dong ba; ri phin mani giri hi, langkhao khao gajang hi ang dukhu mai ba.

²⁸ Odehe, ang thiyaba khe musi khinya hi, khrip longjomrao khe, sain midi bisar khlai hi gam jahi ang dong ba.

²⁹ Ang raoya ja phaya hi, raoyayaba sere dong? Ang ning khasa phaya hi, khuda riyaba sere dong?

³⁰ Ang sangga ma ning thikha de, ang raoyayaba ni basao ha ang sangga la nang.

³¹ Gabra Jisu ni Bupha ar Madai, ang mosol ha grao thiya thihi bo mithi du. Bo ning thaoglao bakhan khlaijao hi dong thing.

³² Damaska ha de, Raja Areta ni bakhla ha, bisardar ang khe remma bao hi Damaska nogor naisoyarao khe bonsi naiso ri ba,

³³ thikhabo, khorong badim ni naigabla ni phrang khangkhra bubim jang bonsi ang khe dikhlai ba, odese boni yao ni phrang ang khai ba.