1 TIMOTHE 4 - DARA GADAIN N.T. with PSA and PRO (BSI)

Mosol slingriyasa

¹ Bese de ragao sisi thi du, bubli phaiginyaba buthu hade subung gejesi thokhiyaba bese buthu ode sgo sgainrao slingriyaba buthu khe khah ri hi bonsi lonma khe dangkhlai ma se.

² Olei slingriyaba buthu de subung girik laiyarao dengkhaoyaba bonsi hamba hamya tharmaiyababo ser khe sao hi dao ha phaba lai dongyaba buthu ni phrang baigo buyaba se.

³ Noh jaba khe bonsi magna re ode asaba jhiginyaba jinis buthu jimane magna re. Grao gibi khe tharmai hi lonyarao khajama ni grao thi hi, Madai sangsaiyaba se thihi ji re.

⁴ Madai khrip jadi sangsaiyaba de hamba gaja se, khajama ni grao thi hi asaba maiyaba khe maniya jama niya.

⁵ Bede thikhade Madai ni grao jang biyaba ha gathar khlai blai kha.

Krista Jisu ni hamba dangyasa

⁶ Ebo grao buthu khe nisi ni daphlungrao niha nisi khna ri khade, Krista Jisu ni hamdaothao dangyasa ja nang; ode, lonma ni grao buthu jang ning yaohon rikphayaba ni hamba slingriyaba ha maniba hamjaodao phalang ma se.

⁷ Thikhabo, Madai khe laphaya hi grao slamyaba buthu ode gda ni subung grajikrao ni haglai kharon ni phrang gibin dong lah, ode Madai ni subung jama ni khlai hi ning lulu ja lah.

⁸ Saomang lulu jayaba de khaisa bubli ni khlai hi hambi, thikhabo, Madai khe baoya bani lulu jayaba de duha ni hayu ode hayu phaiginyaba ha grao hanggaiyaba dong bani, asaba jadi ni khlai hi gabang muilo se.

⁹ Ebo grao de gibi se, hamsisi manima nangdao thaoyaba se.

¹⁰ Thang hi dongyaba Madai ni basao ha jing asa deng bani, dukhu khlai hi jing blaiya si dangba se, bode khrip subung ni sogoyahsa se, bokhe lonyarao ni sogoyah ar jadao kha.

¹¹ Ebo buthu grao khe khna ri hi sling ri lah.

¹² Ning ansa bani saosibo lekha khlaiya da ja thing, grao thiyaba ni balam ha ja thing, dongthai jithai ha ja thing, hamjaoma ni balam ha ja thing, lonma ni balam ha ja thing, gathar jayaba ha ja thing, lonyarao ne phnu riyaba ja lah.

¹³ Ang sophaiya side, nolei khor ni bising ha, Madai grao hanggaiyaba ja thing, sibringyaba ja thing, slingriyaba ja thing, dang hi ning dong lah.

¹⁴ Khraorao bisar khlaiyaba hathan ha, nini basao ha bonsi ni yao buthu khe dengba ha, thidayaba grao buthu khe bai hi, nini ha jinis riyaba, nini ha ning dongyaba khe haglai da bao lah.

¹⁵ Khrip subungbo jadao phalangyaba khe bonsi nuphu mani khlai hi, ebo buthu khe khah ri hi dangpha lang lah.

¹⁶ Ning jar khe jar naiso lah, ning slingriyaba buthu habo jar khe naiso lah. Ebo buthu khe thaoyasi dangpha lang lah, bede thikhade, olei dang hi ning dongkha se, jar jang jar khna riyarao ne khlai hibo sogo riyaba ja ma.