1 TIMOTHE 1 - DARA GADAIN N.T. with PSA and PRO (BSI)

Khlimyaba

¹ Ang Paul, jing khe sogoyahba Madai, ode jing asa khlaiyaba Krista Jisu grao riba lai Krista Jisu ni saosi dangyasa jayaba-

² Lonma ha ani basa gibi gibiyaba Timothe niha: Bupha Madai ar jini Gabra Krista Jisu ni phrang khasaoma ja thing, doyama ja thing, ode shanti nini ha dongpha thing.

Gajai slingriyaba ni phrang girik mane

³ Makedonia raji ha thang mani baigoba ha ning khe ang bujai ba lai ning, sereba sereba grao gibin khe sling riya mani khlai hi, Ephesi ha ning dongsong lah.

⁴ Gda ni subung haglai ode thiso phuya greng buthu ni grao khe (lonma ha Madai ni yaowaithai dongyaba khe hamba slamba tha nam khormu slamyaba khe) bisar khlaiya hi jo mane khlai hi duhabo ang ning khe thiphin du.

⁵ Ebo grao riyaba gibi gibi baoyaba de hamjaoma ning ja kha, bo se khasu ni baothai gathar ni phrang ode lonma gibi gibi ni phrang baigo buyaba se.

⁶ Sereba sereba subung de bonsi gai hi thang bani, ebo jinis buthu ni phrang bonsi degao hi, grao haglai thiyaba gede bonsi thang du.

⁷ Dara slingriyaba jama nangjao la khabo, bonsi grao thiyaba buthu ni ortho khe bonsi bujiya, sahos jang bonsi grao thiyaba buthu khebo boni ortho khe bujiya.

⁸ Dara khe subung gibi jang yaowai khade hamba se thi hi jing mithi du.

⁹ Ebo khe hamsisi jing mithima nang du; Dara khe subung hamyarao ne slam ba niya, dara sbaiyarao ode subung grao layayarao ode Madai khe khiyal khlaiyayarao ode subung phaphi, subung gusu ode dormo khe baoyayaba subung buthu, bonsi ni buma buphathu khe sthaiyarao ar sthaibaiyarao,

¹⁰ khah nangbaiyarao, khiphu mijingyarao, subung ni bepharirao, subung khe thokhi baiyarao, mosol jang smai dangyarao ni basao ha ja thing, ode gibi slingrithai khe badai hi,

¹¹ bakhan khlai jayaba Madai ning grao bai mani bo ninthane deng riyaba, hamba graojma muima ang jar slingriyarao ni basao ha yaowai mane se bo slam ba.

Madai ni khasaoma jang Paul khajayaba

¹² Bo jing khe rao riyaba jini Gabra Krista Jisu niha khajama ni grao khe ang thi du; bo ang khe lonma gnang bao hi jar ni dangyasa ne khlai hi bo ang khe saikho ba.

¹³ Sagang hade rege jaoyaba ode dukhu riyaba, ode khah maya giri hi saja riyaba ang ja lakhabo, lonyayaba subung jaba ni, mithiya hi se ang dang bani, khasaoma khe ang mai ba.

¹⁴ Odehe, Krista Jisu ha dongyaba lonma jang hamjaoma baosi sophai ba jang, jini Gabra ni khasaoma de anthane khlai hi bo gaphao lang la kha.

¹⁵ Krista Jisu de subung phaphirao khe sogo mani khlai hi ebo habsao ha phai ba, thi hi bonsi thiyaba khe hamsi ning lonsing mani dong ode manima nang daoyaba se. Ang de bonsi ni bising ha phaphi jadao thaoyaba se.

¹⁶ Thikhabo, bo jinis ni khlai hi se ani basao ha maya doya khe ang mai ba, ang subung phaphi jadao thaoyaba ani ha ning, Jisu Krista se jar ni khah laoma sothar si khe phnu ri hi thaoglao ni hayu mai mani bokhe lon ginyarao ne khlai hi, daogari nai mani bo angkhe slamphu mani khlai hi.

¹⁷ Raja dedaothao, thaoglao subung, thih thaoyayaba, nuphuyayaba Madai gibi niha se ning bakhan jang muima de thaoglao thaoglao dong thing, Amen.

¹⁸ Ani basa Timothe, sagang ha nini balam ha gorasalirao thidaba lai ning, ebo grao riyaba buthu khe jini ha deng ri du, ebo buthu khe yaowai hi, hamba jbah khe ning jbah nanglai phu mani khlai hi,

¹⁹ lonma jang hamba hamya tharmaiyaba, hamba jang mathao lah, subung gejesi de hamba hamya tharmaiba jang gajain degao bani bonsi lonma ni gede rung baiba lai bonsi baithar kha.

²⁰ Bonsi ni bising ha Humenai jang Aleksandra gaba hi, Madai khe sijiya hi slingphu mani, bonsi khe soithan ni yao ha ang yaopha kha.