1 PETER 5 - DARA GADAIN N.T. with PSA and PRO (BSI)

Madai ni melma buthu

¹ Duha ang, khrao jahibo, Krista dukhu jayaba buthu khe nuyaba ode muima nujao phaiginyaba khe maipha mane asa khlaiyaba ning, nisi ni bising ha longjom ni khraorao khe jing sibring du.

² Nisi ni bakhla ha Madai ni melma buthu khe hamsisi naiso lah, alang alang thi bani dangba niya hi, Madai ning nisi khe dangma nangjaoba lai jasosi ning khajama jang dang lah, rang harbao bani niya hi, khusi dangma mijingyaba khah khe lahi naiso lah.

³ Nisi naisoyarao ni basao ha Raja da ja lah, bonsi nisi khe nai hi sling jao mani dong lah.

⁴ Odese, melma bubra Raja dedao thaoyaba nujao phaikha ning, muima ni Raja ni khrothu srup thaoyayaba khe nisi mai ma.

⁵ Olei jasosi ning, nisi jalairao, khraorao ni grao khe mani lah. Nisi khrip jang gasain ma ha khusi dang ri lah, Madai sanggayarao khe nangjaoya, thikhabo jar basa jayarao khede khasaoma ri re, ode bo thi du.

⁶ Odebani, bo gibi bubli habo nisi khe guju sugu phu mani, Madai ni yao bol raodaoyaba ni bakhla ha ning basasa jahi dong lah.

⁷ Bo jar ning nisi ni gede khah ridu bani nisi ni khrip khah waimu khe boni basao ha deng lah.

⁸ Khiyal khlai hi, girik lah. Nisi ni sotru Soithan de misi raigonma hoba lai, ji mani smai hi daoding bai du.

⁹ Lonma ha ning raothe the jahi song lah, ode nanglai lah. Habsao bubim ha nisi ni daphlungrao, olei jasosi ning bonsibo dukhu jaba thihi nisi tharmai du.

¹⁰ Khaisa bubli nisi dukhu khlai bani yaohon ha, Krista ha boni thaoglao ni muima mai mane nisi khe longyaba, khasaoma ha gablaiyaba Madai ning nisi khe suphin nang thi du, bo nisi khe bol rao ri nang, bo raothe the khlai nang.

¹¹ Boni ha ning raothai de thaoglao thaoglao dong thing. Amen.

Digarba ni khlim ba

¹² Ani daphlung, subung lonma gnang, ang wainsoyaba subung, Silvan ni yao ha ebo laijma songthe the nisi ne ang haiha du. Ebo Madai ni khasaoma gibi jadaothaoyaba se thihi nisi ne khna ri mani ode, oraha raothe the song mani nisi khe jing sibringyaba grao se.

¹³ Nisi lai jasosi ning saikho jaoyarao Babulon ni longjom nisi khe khlim ha du; olei jasosi ning, ani basa Mark bo nisi khe khlim ha du.

¹⁴ Kristian ni hamjaoma jang khudim hi khlim lai lah. Nisi Krista ha dongyarao khrip niha santi dong thing.