1 PETER 2 - DARA GADAIN N.T. with PSA and PRO (BSI)

Longthai gathang ar jadi gathar

¹ Odebani, khrip jadi hamyayaba, thokhiyaba, giriklaiyaba, hingsa ode khrip sijiyaba khe dangkhlai hi,

² sogoma ha nisi dedao phalang phuma ni khlai hi, nana gili hajaiyarao lai, bese gede abudih musibo gibringyayaba khe libi lah. Ede khlai hi nisi bara hi sogo jao phu nang.

³ “Gabra bislei ham du thihi nisi nainai sang” thihi reb ba lai.

Longthai gathang ar jadi saikho jaoyarao

⁴ Boni gede thang lah, bode longthai gathang, subung buthu dangkhlaiyaba se. Thikhabo, Madai ni muthai hade muilo gnang ar saikho jaoyaba se.

⁵ Odebani, nisi bo longthai gathang buthu lai ja hi, bese ni gede noh ne khlai hi longthai riyenyaba ja lah. Oraha se Jisu ni khlai hi Madai khe mani mane gatha hi, bese gede ni bandai khe yaophuyaba, Jonthai gathar nisi ja ma.

⁶ Odebani, Madai ni laisi ha ede thi du, Nai lah, muilo gnang longthai ang saikhoyaba khe, bokhe Zion ha nohgrong ni khlai hi ang gai kha, Sere bokhe lon du, bo laji nu nang niya.

⁷ Nisi bokhe lonyarao ni khlai hide, bode muilo jadao thaoyaba se, thikhabo bokhe lonyayarao ne khlai hi de, Noh dangyarao, longthai dangkhlaiyaba khe ning, noh grong ha longthai nang daothaoyaba ja kha, thi du.

⁸ Ar gibin hathan ha Madai ni grao ha ede thi du, Subung buthu khe khuda riyaba longthai, subung buthu khe galai riyaba longthaima se, Grao khe bonsi maniyaba ni bonsi khuda hi galai ba. Olei jama ni khlai hi ning bonsi khe saikho daba se.

⁹ Thikhabo, nisi de boni jnama ha hap mani khlai hi andar ni phrang nisi khe long hi muima jang gmang thaosisi khusi dangyaba buthu khe bara riphu mani khlai hi nisi saikho jaoyaba jadi se, nisi de Jonthaima ni bongso, jadi gathar, Madai ni phantha ja kha.

¹⁰ Sagang hade nisi Madai ni subung buthu jaya, thikhabo, duha de nisi ja kha; sagang hade nisi maya maiya, thikhabo duha de maya doya mai kha.

Madai ni dangyasarao

¹¹ Hamjao daothaoyarao, ebo habsao hade nisi raji gibin ha naorai jahi se dong bani, bese jang nanglaiyaba saomang libima buthu ni phrang degao mani khlai hi ang nisi khe khainsu du.

¹² Odehe, Jentailrao ni bising ha nisi ni dongthai majang thing. Odehe, hamya khusi dangyaba ha bonsi nisi khe hamya thi la khabo, nisi hamba khusi dangyaba buthu khe bonsi jar ning nu la nang, ode Madai jini ha dongphai khali, bokhe bonsi bakhan khlai ma se.

¹³ Gabra ni khlai hi subung saikhoyaba hukhum gnang dongyaba si ni bakhla ha nisi dong lah, jadaothao hukhum dong ba, Raja dedaothao ni grao khe mani lah,

¹⁴ hamya khusi dangyarao khe saja ri mani ode hamba khusi dangyarao khe bakhan khlai mani, bo saikhoyaba raji gibim jang naisoyarao ni grao khebo mani lah.

¹⁵ Musibo tharmaiyayaba gibir grao thiyaba khe niyathai mani khlai hi nisi khe Madai ning nangjaoba se.

¹⁶ Nisi sadhin ja kha, thikhabo nisi ni sadhin khe phap ha phung mani yaowaiya hi Madai ni leng jahi dang mani yaowai lah.

¹⁷ Khrip subung khe man khlai lah, lonma ha daphlungrao khe hamjao lah, Madai khe khin lah, ode Raja dedao thaoyaba khe bakhan khlai lah.

Krista ni dukhu khe daogari nai mani

¹⁸ Dangyasarao, man jang nisi ni bubrarao ni grao bakhla ha dong lah, maigru gru jahi ode gasain mani grao se ning niya hi, bo khah pekhaiba raoyarao ni grao khebo mani lah.

¹⁹ Malai, Madai ni nangjaothai khe tharmai bani dukhu jaginyaba habo dukhu khlai re thikhade, bo se Madai khe khaja ri re.

²⁰ Nisi khusi dang gajai bani khlai hi sujaoba ha, khah laohi dukhu ajao la khabo, nisi ni khlai hi snadi bumu ja ma? Hamba khusi dangba ha nisi dukhu khlai du ode, khah laohi nisi dukhu ajao khade, Madai ni khajama se.

²¹ Ningkhe eboni khlai hi se long ba, bede thikhade Kristabo nisi ni khlai hi dukhu ajao hi nisi boni lama ha thang mani khlai hi nisi ne masi daogari ri lang ba.

²² Bo de musi phap khusi dangya, boni khuh ni phrang musibo thokhiyaba graobo baigoya.

²³ Bokhe malai jo la khabo, bode jophinya, bode dukhu jabani saosi khebo jaobaiya; gibi jang bisar khlaiyaba niha se jar khe jar yaopha la ba.

²⁴ Phap ha thih dada dormo gede jing thangphu mani khlai hi, jarni sao ha sugu hi kross ha ri la hi jini phap buthu khe bo horkhu kha, ode boni bumai jang nisi hamma mai kha.

²⁵ Sagang hade nisi melma lai lama gma ba, thikhabo duha de, melma bubra nisi ni bese raokhiyaba niha nisi phaiphin kha.