1 PETER 1 - DARA GADAIN N.T. with PSA and PRO (BSI)

Khlimyaba

¹ Jisu Krista ni haijaoyasa Peter de, Ponto, Galatia, Kappadokia, Asia, ar Bithunia raji buthu ha dong phlungyarao,

² Bupha Madai mithi daba lai saikho dajaoyaba, Jisu Krista ni grao khe mani mane ode boni thijao ha susa hi ragao mani Bese jang gathar khlai jaoyarao niha: Nisi ni basao ha khasaoma ar shanti bara phalang thing.

Asa ni hayu

³ Jini Gabra Jisu Krista ni Bupha ode Madai ni bakhan ja thing. Subung githi ni phrang Jisu Krista khe baijaphin ri ba, asa gathang khe mai mani khlai hi, boni maya gedeba jang, hayu gadain ha jing khe mathangphin ba.

⁴ Ode don phantha hamya jathaoyayaba, gusu jayayaba, srup thaoyayaba khe nisi ne khlai hi sorgo ha hamsisi deng ri kha.

⁵ Nisi de, bokhe lon bani sogoma ha salai hi nisi dong kha, bubli jamthaoba ha nujao hi dongba basain sosi, Madai ni raothai jang nisi gajeb jaoyaba ja kha, ode bubli jamthaoba ha nujao mani basain sosi, Madai ni raothai jang nisi naiso jao ma se.

⁶ Gibin gibin naigrik goron hi gmang giji ja la khabo, nisi khaja hi dong lah.

⁷ Olei nisi niha lonma gibi dongyaba khe nainai ma se. Gajao hamya japhuyaba khe ning wai ha malang hi nainai kha la, bo thanebo muilo jadaoyaba nisi ni hayu khede nainai ma ning thi hi nisi tharmai lah, Jisu Krista nujao phaiphin khali se, bakhan, muima, ode khasaoma maiphu mani khlai hi.

⁸ Bokhe nuya khabo nisi hamjao du; duhabo bokhe nisi nuya hibo, nisi lon du, thisophuya khajama ni muima jang nisi gablai du;

⁹ nisi lonyaba ni bathai, nisi ni bese ni sogoma khe mai ma sampha kha bani.

¹⁰ Ebo sogoma ni balam khe gorasalirao thaoya si smai hi bonsi naithai dada nisi niha Madai jinis riyaba khasaoma sophai ginyaba khe bo sainthi da kha.

¹¹ Bonsi niha Krista ni Bese dongpha hi, Krista dukhu maiginyaba buthu ode boni yaohon ha, muima dongphai mani grao khe bo sainthiyaba grao dong bani, snadi bubli ha bo phai nang, bede jahi bo phai nang thihi bonsi tharmai ma nangjao ba.

¹² Bonsi ne niya hi, nisi ne khlai hi khusi ang riba se thihi nisi ne tharmai ri du. Sorgo ni phrang haihayaba Bese Gathar ni juruma jang nisi niha hamba graojma khe sainthiyarao ning bonsi nisi niha thi kha. Bo jinis buthu khe sorgo ni deglarao khah muh rihi hamsi ning naima mijing ba.

Gathar dongthai ha dong mane longyaba

¹³ Odebani, dang mani khlai hi nisi baoyaba buthu khe salai lah. Jar khe sibring lah, Jisu Krista nujao phaiba ha khasaoma khe nisi nebo labu ri mani khlai hi asa khlai lah.

¹⁴ Basa grao maniyarao lai dong hi, sagang ha jar ni phap libima ha dongba lai nisi da dong lah.

¹⁵ Nisi khe longyaba gathar dongba lai, nisibo khrip yaowaithai ha gathar ja lah;

¹⁶ Nisi gathar jama nang du, bede thikhade ang gathar se, thi hi reb du.

¹⁷ Naidao naiyadao jaya hi, khrip subung jar khusi dangba lai ning bisar khlai riyaba khe, bupha thihi jirik khade, eraha nisi naorai lai jahi dongba ha ning bokhe man jang khin dada yaowai lah.

¹⁸ Bede thikhade, nisi ni greng buthu ni phrang dongthai jithai phaipha buyaba, gibirrao ni dongthai ni phrang de jinis hamya japhuyaba rang bagrai gajao buthu jang nisi khojaoyaba niya,

¹⁹ melmasa mainthi giriyaba, ode musi gajai giriyaba, Krista ni thijao muilo gnang jang se khojao ba thi hi nisi tharmai kha.

²⁰ Bode phirthi khe sangsai bani sagang ha ning bokhe saikho kha; thikhabo, nisi ne khlai hi ning bubli jamthaoba ha bo nujaoba se.

²¹ Githi ni phrang bokhe mathang phinyaba Madai khe nisi lon kha; odese Madai de nisi ni lonma ode asama dengyaba ning ja kha.

²² Gibi jang daphlungrao khe hamjao mani khlai hi, grao gibi khe mani hi, nisi ni hayu ni dongthai buthu khe nisi gathar khlai khade, khah guthu ni phrang nisi hamjao lai lah.

²³ Bumuh hamya japhuyaba ni phrang niya hi, Madai ni grao thang hi ning dongyaba, ode dong songyaba ha ning, bumuh hamya japhuyayaba ni phrang nisi hajai slamyaba ja kha.

²⁴ Sastro thiba lai, Khrip subungbo sam ba lai se, Bonsi ni khrip muimabo sam bubar lai se, Sam de rain hi, boni bubar bo grai re,

²⁵ Thikhabo, Gabra ni grao de dongsong ma se, Bo ning ja kha, hamba graojma nisi ne khna riyaba se.