1 KORINTH 6 - DARA GADAIN N.T. with PSA and PRO (BSI)

Lonyarao ni bising ha gaso suso

¹ Nisi ni bising ha subung asababo malai ni basao ha nam khormu lahi, subung gatharrao niha soriya hi, subung dormo niyayarao niha boni gajai khe bonsi sori rao nang na?

² Niyakha la subung gatharrao se habsao ni grao ni balam ha bonsi bisar khlai ma se thihi nisi mithiya na somo? Habsao ni bisar khe nisi ning bisar khlai ma se thikha de, basasayaba nam khormu buthu khe bisar khlai mani khemotha giriyaba nisi ja nang niya?

³ Duha hamhi dong bani grao khe thiya hi, sorgo ni deglarao ni balam khe asababo jing bisar khlai ma nang ma se thihi nisi mithiya na somo?

⁴ Olei nam khormu grao jayaba khe lahi, longjom ha bojom jayarao niha nisi bisar khlai ri ma na somo?

⁵ Nisi laji mani khlai hi ang thi du. Lonyaba daphlungrao ni gejer ha hamsisi bisar khlai phuyaba subung girikyaba nisi ni bising ha saosi bo giri na somo?

⁶ Jarni daphlung jang daphlung khe bisar ha bonsi so ri re? Bobo lonyayarao ni sagang ha se kho!

⁷ Gibi gibi de, nisi ni gejer ha asaba nam khormu ha, nisi raoya kha thiyaba se. Nisi ni basao ha bonsi gajai dangyaba khe snadi jabani nisi dukhu khah laoya ba? Snadi jabani bo maiginyaba phantha khe nisi laya ba?

⁸ Boni baslai ha jarni daphlungrao khe hamya khlaiyaba odehe raoya khlaiyaba se nisi ja ba.

⁹ Thikha la, subung dormo niyayarao de Madai ni raji khe mai nang niya thiyaba khe nisi mithiya na somo? Da thokhijao, hamjao baiyaba buthu, saokhuli khe biyarao, gaori gaora jayarao, miyahsa sao khe phain jiyarao, khiphu ha mijingyarao,

¹⁰ khao jibaiya buthu, harbaoyarao, bao la jabaiyarao, subung jothaiba raoyarao, dakhatrao, eleiyaba jinis khe dangyarao de Madai ni raji khe mai nang niya.

¹¹ Nisi ni bising ha gejesi de eleiyaba khe nisi dang re. Thikhabo, Gabra Jisu Krista ni bumu jang jini Madai ni Bese ha ning, nisi susajao kha, odehe nisi gathar khlaijao kha, ode nisi dormo khlaijao kha.

Saomang ha Madai khe bakhan khlaiyaba

¹² Anthane khlai hi de khrip gathar se, thikhabo khrip de lab jaya, anthane khlai hi de khrip gathar se, thikhabo asaba ni leng ha dong mane ang nangjaoya.

¹³ Makham de bohoh ni khlai hi se, bohohbo makham ni khlai hi se, thikhabo, Madai jang sjam jao ma se. Saomang khe hamjao baiyaba phap khusi dang mani khlai hi niya, Gabra ni khlai hi se; Gabrabo saomang ni khlai hi jimu lingmu ri du.

¹⁴ Odehe, Madai ning Gabra khe jarni raothai mathang ba, jing khebo boni raothai jang se jing khe mathang ma.

¹⁵ Nisi ni saomang buthu khe Krista ni saomang ni bedep buthu se thihi nisi mithiya na somo? Olei thikha la, Krista ni saomang bedep buthu khe lahi sao khe phainyaba ha ang slam ma na somo? Slamya dou!

¹⁶ Malai jang, baosi saomang phain ji kha de, bonsi jang saomang masi ja kha thihi nisi mithiya na somo? Bonsi ginibo saomang masi ja kha, thi hi reb du.

¹⁷ Thikhabo, sere Gabra jang masi ja du, bo jang bese ha saomang masi jaba se.

¹⁸ Hamjao baiyaba phap khe dangkhlai lah! Gibin asaba khebo subung dangyaba de baji ni saomang ha dang ba; thikhabo hamjao baiyaba khe baisi khlai hi dangyaba de jarni saomang ni basao ha ning bo phap khusi dang la ba se.

¹⁹ Niyakha la nisi ni saomang khe Madai ni phrang nisi maiyaba, nisi jang baosi dongphayaba Bese Gathar ni bikhoh se thihi nisi mithiya na somo? Jarni khlai hi nisi niya,

²⁰ dam rihi nisi braijao kha; odebani nisi saomang jang Madai khe bakhan khlai lah.