1 KORINTH 5 - DARA GADAIN N.T. with PSA and PRO (BSI)

Longjom ni bising ha rege hamjao laiyaba

¹ Nisi ni bising ha rege rege hamjao laiyaba Jentailrao ni bising habo dongba giriyaba, grao gabang gublung hi, subung saosi jar ni bupha ni bihih jang noh jayaba khe noh ja kha.

² Nisi jakha de sangga la du! Khah waimu se nisi nangma niya na? Olei khusi dangyaba khe de nisi ni bising ni phrang baji ha deng ma nang du.

³ Saomang jang nisi ni bising ha dongya la khabo, bese ha ang dong, olei khusi dangyaba balam khe nisi ni bising ha dongba la Gabra Jisu ni bumu jang ang bisar khlai hi thik khlai kha.

⁴ Gabra Jisu Krista ni bumu jang nisi bojom jaba ha, ani bese bo dongpha hi, jing Gabra Jisu ni raothai khe yaowai dada, bo subung khe Gabra ni basain ha boni bese sogojao hi bo dongphu mani khlai hi,

⁵ boni saomang khe sjam mani khlai hi Soithan ni yao ha bokhe nepha ma se.

⁶ Nisi sanggayaba buthu de hamya dou. Humao gijisa jang hon buduri saphin hi ladu khlaiyaba khe masao thar phu du thihi nisi mithiya na somo?

⁷ Nisi gibi jang humao giriyaba ja ba lai ning, hon bodo gadain phar phar japhu mani khlai hi, humao gajam khe ragao sisi saikhlai lah. Jini baiglai busu ni mel phaiyaba ha melmasa Krista khe ning bo bandai yao pha kha.

⁸ Odebani, jing mel phai lai nang, humao gajam jang mel phaiya hi, hamyayaba jang phap ni humao jang mel phaiya hi, gibiyaba odehe grao gibiyaba humao giriyaba ni hon jang jing mel phai lai nang.

⁹ Ang laijma haihayaba ha, hamjao baiyarao jang lugu jaya mani khlai hi nisi khe ang thi du.

¹⁰ Ebo habsao ni subung, hamjao baiyarao, subung harbaoyarao, subung thokhi baiyarao, saokhuli khe biyarao ni dol jang lugu da ja thihi ang thiya, olei jakha de, habsao khe nisi garlang ma nang ma se.

¹¹ Bede thikhade, duha daphlung ni bumu la hi, hamjao baiyarao ja thing, subung harbaoyaba ja thing, saokhuli khe biyaba ja thing, subung khe nalaibo ran thaiyaba ja thing, ju baola jabaiyaba ja thing, dakhat ja thing, nisi jaya mani khlai hi se nisi khe ang thi ba. Eleiyaba subung khe makham sosibo da jipha lai.

¹² Baji gede ni subung buthu ni grao khe ang se bisar khlai ma na? Nisi bisar khlai riginyaba buthu la boni bising ha dongyarao khe bonsi niya na somo?

¹³ Baji gede ni subung buthu ni grao ni balam hade Madai ning bisar khlai ma se. Madai ni laisi ha, Bo subung hamyayaba khe nisi ni bising ni phrang rik khlai lah, thihi reb ba lai.