1 KORINTH 2 - DARA GADAIN N.T. with PSA and PRO (BSI)

Dikphayaba Krista ni graojma

¹ Ang de daphlungrao, Madai ni grao makhao khe bai mani nisi niha ang phaiba ha, grao jo ba ringdao hi odehe gyani jadaoba lai ang phaiya.

² Jisu Krista jang, bokhe ning dikphayaba grao khe garhi de nisi ni bising ha gibin musi khebo khna rima nangjaoya.

³ Nisi ni bising ha raoya daothao jahi khinma jang the the masi ang dong ba.

⁴ Ang grao thiyaba odehe ani sibringyaba ha grao joba miliyaba jang grao gyan khe ang yaowaiya, bese jang boni raothai khe phnu mani smai hi se ang grao thi ba,

⁵ nisi ni lonma khe subung gyan ha asa khlaiya hi, Madai ni raothai ha asa japhu mani khlai hi.

Madai ni gyan

⁶ Bede thikhade, phura khrao ha lapha jaoyarao ni bising ha de, gyan ni grao khe jing sainthi du, bode duhani habsao ni gyan jang thiya; bonsi ni bisardar jamginyarao gyan jangbo niya.

⁷ Madai ni grao gyan, grao makhao hui hi dengyaba, jini muima ni khlai hi Madai ning habsao khe sangsai mani sagang ha bo salai dayaba se.

⁸ Duha habsao khe bisar khlaiyarao saosibo ebo grao khe bujiya; bonsi buji khade, muima ni Raja khe dikpha nang niya mu.

⁹ Thikhabo, Madai ni laisi ha, Muthai jang nuba giri, odehe khmao habo khnaba giri, Subung ni khah habo hapya, Madai ning jar hamjaoyarao ne khlai hi bo salai ri ba, thihi reb ba lai se ja ba.

¹⁰ Bo jinis buthu khe jini ha Madai ning Bese jang bo baiphai kha; Bese de jamthar si Madai ni thuthai buthu khebo bo su du.

¹¹ Subung ni baothai buthu khe, boniha dongyaba Bese khe garhi de sere ning mithi nang? Olei jasosi ning, Madai ni Bese khe garhi de Madai baoyaba buthu khe saosi bo mithiya.

¹² Odebani, bo magna Madai jinthane jinis riyaba buthu khe jing mithi phu mani khlai hi, jing de habsao ni bese niya hi, Madai niha Bese dongyaba khe se jing mai ba.

¹³ Subung ni gyan jang bonsi slingriyaba khe yaowai ba niya hi, Bese slingriyaba khe yaowai dada jing grao sainthi hi, Bese ni subung buthu niha Bese ni jinis gede ni jinis buthu khe se jing thi phla re.

¹⁴ Saomang ni subung de Madai ni Bese jang jinis riyaba buthu khe khajaya, bonthane de gibir jayaba se. Bese jang se ning mithi phuyaba se bani, bo bujiba bo buji phuya.

¹⁵ Bese ni subung de khrip jadi jinis khe su du, bokhe saosi bo badaiya.

¹⁶ Madai ni laisi thiba lai, Gabra ni khah khe sere ning tharmai ba? Bokhe sling rima sere dong kho? Thikhabo, jini ha de Krista ni khathai dong.