1 KORINTH 16 - DARA GADAIN N.T. with PSA and PRO (BSI)

Subung gatharrao ne khrangphain

¹ Odehe subung gatharrao ne khrangphain ni balam ha de, Galatia raji ni longjom sarao niha dangthai khe ang thiba lai, nisibo dang lah.

² Hapthasi ni basain sagangthao ha haptha phorong, khrip jadi khe nisi bojai ba lai ning, ang phaiba ha khrang ma nangya mani khlai hi, bojom khlai lai lah.

³ Odehe, ang phai ba ha, nisi jinis riyaba buthu khe Jerusalem ha langpha mani khlai hi, nisi subung lonma ha khah deyarao khe laisi reb hi ang haipha ri ha nang.

⁴ Angbo thang ma ning nang kha de, bonsi ang jang baosi thang ma se.

Paul mophosol thangma baoyaba

⁵ Makedonia raji ha ang thang bani yaohon ha nisi niha ang hapsing phai nang, Makedonia raji ha asaba dara jang ang thangma bao du.

⁶ Boha nisi niha ang dong thao la phu re, maising sosibo ja la phu re, asaba bo ang thangya ba si ha nisi ang khe juru phu mani khlai hi.

⁷ Bede thikhade duha phaiba ha lama ha nisi jang goron lai ma ang nangjaoya. Gabra nangjao kha de, khaisa bubli de nisi niha ang dongthao mani asa khlai du.

⁸ Thikhabo, Pentikos ni basain sosi Ephesi ha ang dongthao ma,

⁹ lab jadaothao khusi dang mani, derga gowar anthane khlai hi bonsi khuru du, ode nanglaiyarao bo gabang bang bi.

¹⁰ Timothe phai kha ning, nisi ni bising ha bo hamsisi dongrao mani khlai hi nisi hamsisi naidao lah, bo de ang lai jasosi ning Gabra ni khusi dangyaba se.

¹¹ Odebani, saosi khebo da naisle lah. Bo ani ha phaiphin phu mani khlai hi santi jang digar lah; daphlung gibin buthu jang baosi bokhe goron mani ang asa khlai pha du.

¹² Duha, jini daphlung Appolo ni grao khede daphlung gibin buthu jang nisi niha phai mani hamsi ning khainsuyaba se. Thikhabo duha de bo musibo nangjaoya. Bubli hajora mai kha ning, bo asaba dara jang phai ma se.

Bidai ni sibringthai

¹³ Smao hi ning dong lah, lonma ha rao hi ning song lah, khitha rao hi dong lah, raodao thao jahi dong lah.

¹⁴ Nisi khusi dangyaba si ha hamjaoma khasaoma ha dang ba ja thing.

¹⁵ Stephan ni nohkhor ni balam ha nisi tharmai du. Akaia raji ni bising ha sagangthao Kristian ja jenyaba se, ode subung gatharrao ne khusi dang ri mani khlai hi bonsi jar khe yaopha kha;

¹⁶ olei subung buthu jang, bonsi khusi dang phalaiyarao ode dukhu khlai phayarao niha hap mani khlai hi nisi khe ang khainsu du.

¹⁷ Stephan jang baosi, Fortunata, ode Akaia thu phaiba khe ang khaja hi, nisi dongya khabo, nu jaoya hi bonsi ang khe slam bani,

¹⁸ bonsi ani bese jang nisi ni bese khebo masa ba. Odebani, oleiyaba subung buthu khe guju bao lah.

Khlimyaba

¹⁹ Asia raji ni longjom buthu nisi khe khlim ha du. Akuila jang Priska odehe bonsi ni noh ha longjom bojom jayaraobo Gabra ha gabang ning wainso ma jang bonsi nisi khe khlim ha du.

²⁰ Daphlungrao khripbo nisi khe bonsi khlim ha du. Gathar khudimthai jang khlim lai lah.

²¹ Ang Paul, jar ning ebo khlimyaba khe ani yao jang ning ang reb ba se.

²² Sere Gabra khe hamjaoma dengya, bo sarijao hi dong thing!

²³ Gabra Jisu Krista ni khasaoma nisi niha dongpha thing.

²⁴ Krista Jisu ha ani hamjaoma de nisi khrip niha dongpha thing. Gabra de phaidu dou (Maranatha).