1 KORINTH 10 - DARA GADAIN N.T. with PSA and PRO (BSI)

Saokhuli buthu khe jirikya mane ranyaba

¹ Daphlungrao, ebo khe nisi tharmai mane ang nangjao du: Olei jini greng buthu, bonsi khripbo jimi bakhla ha dong thar hi, sagor khe bonsi bailang ba.

² Moses jang dongpha hi jimi jang sagor ha khripbo bonsi baptisma jahi dong ba.

³ Bonsi khrip jang bese gede ni makham khe baosi bonsi jipha lai ba,

⁴ bonsi khripbo bese gede ni dih khe baosi bonsi lingpha lai ba. Bonsi khe langsmaiyaba bese gede ni longthaima ni phrang bonsi lingyaba, bo longthaima de Krista ning ja kha.

⁵ Olei jahi bo, bonsi ni bising ha bangdao hi bonsi ni basao ha Madai jajaoya ja ba; odebani bonsi hajengling ha sthaijao kha.

⁶ Duha de bonsi hamya khusi dangma mijing ba lai jing dang ma mijingya mani khlai hi oleiyaba jinis buthu de jinthane phnu riyaba se.

⁷ Bonsi ni bising ha sereba sereba saokhuli khe biba lai da bi pha “Subung buthu de jima lingma ni khlai hi bonsi khamlai ba, phaoli phaosa jima ni khlai hi bonsi baija ba, thi hi reb ba lai.

⁸ Bonsi ni bising ha gejesi hamjao baiyaba phap jang ning khe rege rege khlaiba lai ning khe jing rege rege khlaiya dou, sainsi ni bising ha subung rjing khon tham sosi bonsi olei bani se thih ba.

⁹ Bonsi ni bising ha gejesi Gabra khe bonsi nainai ba lai jing nainaiya dou, bede thikhade bonsi jbu jang suthai jao thar ba.

¹⁰ Bonsi ni bising ha gejesi berbai hi sjamyaba jang bo sjamba lai de, jing berbaiya dou.

¹¹ Bo jinis buthu khe nisi ne daogari phnu ri mani khlai hi bonsi ni basao ha sophai ba se; jini bubli jamthao ba ha sophaiyaba buthu khe sling ri mane bo reb ba se.

¹² Odebani, sere rao hi song du thi hi jar khe baoyaba de girik la thing, bo galaijao nang.

¹³ Nisi naigrik goronyaba khe subung goronyaba thane baraya. Madai de gibiyaba se, nisi dukhu jaba tha braha nisi khe dukhu ja ri nang niya. Naigrik sophai bani lugu lugu, nisi dukhu ajao phu mani khlai hi khai hunyaba lama srap slam ma se.”

Saokhuli biyaba khe dangkhlai ma nang du

¹⁴ Odebani ang hamjaoyarao, saokhuli biyaba khe dangkhlai lah.

¹⁵ Khrip jinis tharmaiyaba hamsisi tharmaiyaba subung niha thiba lai ning ang thi du; ang grao thiyaba khe hamsisi nisi bao lah.

¹⁶ Hamthai ni bela ha hamthai jing riyaba la Krista ni thijao jang masi yaowai phalai ba niya na somo? Jing hon sasoyaba la, Krista ni bahain jang masi yaowai phalai ba niya na somo?

¹⁷ Hon phersi ni khlai hi, jini gabang saomang masi jing ja kha, hon phersi khe jing khrip mai kha.

¹⁸ Saomang gede ha Israel sarao khe bao ha sang; bandai riyaba ni mogong jiyarao ni khapra khe bonsi yaowai phalaiya na somo?

¹⁹ Thikha la, ebo grao ha la ang snadi khe phnu du? Saokhuli buthu niha ji mani yaophayaba la muilo dong thihi ang thiba na somo? Niyakha la, saokhuli bo ortho gnang se thihi ang thiba na somo?

²⁰ Braha ja ma, Jentailrao ni bandai de Madai niha niya hi, sgain sogo buthu niha se bandai ri ba thihi se ang thi ba. Nisi khede sgain sogo buthu jang masi yaowai phalai mane ang nisi khe nangjaoya.

²¹ Gabra ni bela jang sgain sogo buthu ni bela lingpha laiphu nang niya. Gabra ni basang jang sgain sogo buthu ni basang hade ji pha laibo jipha laiphu nang niya.

²² Niyakha la, Gabra ni hingsa khe jing wai phnang ma baoba na somo? Bonthane jing raodao na somo?

Khrip ha Madai ni muima ne dang lah

²³ Khrip khusi dang ba gathar se, thihi thi re, thikhabo khrip khusi dang ba hamya. Khrip khusi dang ba gathar se, thihi thi re, thikhabo, khrip khusi dangyaba, subung khe hamba slamdaoya.

²⁴ Saosi bo jar ham mani smaiya hi, malai ni ham mane smai la thing.

²⁵ Mogong ni dukhan ha bonsi phainyaba si khe hamba hamya mithi mani khlai hi musi khebo bising bohor singya hi ji lah,

²⁶ Phirthi jang boni bising ha dongyaba khrip de Gabra ni gaja se, thihi reb ba lai.

²⁷ Lonyayarao ni bising ha malai makham ji mani khlai hi nisi khe longyaba ha, nisi thangma nangjao khade, hamba hamya mithi mani musi khebo bising bohor singya hi, bonsi nisi ne riyaba si khe nisi ji lah.

²⁸ Thikhabo, jodi sereba ning khe sing kha de, Ebo de bandai ha yaopha kha, bo nisi khe thikha de, bo nisi khe thi bani khlai hi, odehe hamba hamya mithi bani khlai hi da ji,

²⁹ ning hamba hamya mithiyaba ni grao khe ang thiya, bokhe hamba hamya mithiyaba khe ang thiyaba grao se. Thikha la, ani sadhin khe sumja bani gibin subung hamba hamya mithiyaba jang bokhe phrao jep ma? thihi malai thi ma.

³⁰ Khajama jang ang jihi, khajama ni grao khe ang thi bani basao ha sumja bani ang siji jao ma?

³¹ Odebani, nisi jikha bo lingkha bo, nisi dangyaba si khe Madai ni muima ni khlai hi dang lah.

³² Judarao ni khlai hibo, Greekrao ni khlai hibo, Madai ni longjomrao ni khlai hibo, bonsi galai mani khlai hi musi khebo nisi khusi da dang lah.

³³ Ang ning jarni lab khe smaiya hi bonsi khe sogo phu mani, gabang subung ham mani lama smai hi khrip jinis ha khrip subung khe khaja rima ang baoba lai jasosi ning.