1 KORINTH 1 - DARA GADAIN N.T. with PSA and PRO (BSI)

Khlimyaba

¹ Paul, Jisu Krista ni haijaoyasa ja mani Madai ni nangjaoma ha long jaoyaba, ar boni daphlung Sosthen de;

² Korinth nogor ni Madai ni longjom, Krista Jisu ha gathar khlai jaohi dongyarao niha, odehe khrip hathan ha jini Gabra Jisu Krista, bonsi jang jini Gabra ni bumu layarao khrip, subung gathar ja mani longjaoyarao niha ning;

³ Jini bupha Madai jang Gabra Jisu Krista ni phrang khasaoma ar santi nisi niha dongpha thing.

Krista ha hamthai buthu

⁴ Krista Jisu ha Madai ni khasaoma nisi ne riyaba gibiyaba khe, ani Madai niha nalaibo ang khajama ni grao khe sainthi du.

⁵ Boni ha de, khrip gede ni balam ha khrip grao sainthiyaba odehe, khrip bujima ha gnang khlaijao hi nisi dong kha.

⁶ Nisi ni bising ha Krista ni grao khna rihi dengyaba khe gejeb dao ri kha.

⁷ Odebani, jini Gabra Jisu Krista nujao phai ba khe nisi jon bani bising ha, bese gede jinis riyaba ha musibo bangya jaya.

⁸ Jini Gabra Jisu Krista ni basain ha gajai giri hi nisi dongphu mani bo ning nisi khe jamba sosi rao rima se.

⁹ Boni basa, jini Gabra Jisu Krista dong pha laiyaba ha long singyaba Madai de lonma gnang se.

Longjom ha gibin jayaba

¹⁰ Daphlungrao, nisi khrip jang khah ha baosi jalai hi, degao laiya hi dong mani khlai hi khah masi jahi, saomang mangsi ja dada, nisi ni baothai masi japhu mani khlai hi jini Gabra Jisu Krista ni bumu jang nisi khe ang khainsu du.

¹¹ Ani daphlungrao, nisi ni bising tha laiyayaba giri thi hi Kloi ni apnarao ning bonsi ang khe thi ba.

¹² Ang thiyaba ortho de ebo se: Nisi ni bising ha khrip bo, Ang de Paul ni dol se, ang de Apollo ni dol se, ang de Kipha ni dol se, niyakha la, ang de Krista ni dol se nisi thi du.

¹³ Krista la ronphai lai ba? Nisi ni khlai hi Paul kross ha dikpha jao ba na somo? Niyakha la, Paul ni bumu jang nisi baptisma laba na somo?

¹⁴ Nisi ni bising ha Kipha jang Gaia thu khe garhi saosi khebo ang baptisma khlaiyaba ni Madai niha khajama ni grao khe ang thi du.

¹⁵ Ode niyakha de, nisi ni bising ha saosi bo ani bumu jang baptisma laba thihi nisi thijao nang.

¹⁶ (Stephan ni nohkhor khebo ang baptisma ri ba; bo buthu khe garhi de saosi khebo ang baptisma riba thihi tharmaiya).

¹⁷ Krista de baptisma ri mani khlai hi ang khe haihaya. Hamba graojma khe sainthi mani khlai hi se bo ang khe haiha ba, girikma jang grao gidi ring bani sainthi mani khlai hi bo ang khe haihaya, ode niyakha de, Krista ni kross khe raothai giri hi, slamyaba jajao nang.

Krista, Madai ni gyan ar raothai

¹⁸ Kross ni grao de jamsaiyarao ne khlai hi de gibir jaba se, thikhabo jing goma mai hi dongyarao ni khlai hi de Madai ni raothai se.

¹⁹ Subung gyanrao ni gyan khe ang sjam nang, odehe subung bujiyarao ni bujima khe ang dangkhla ma se, thihi bo reb du.

²⁰ Subung gyani braha dong? Dara mithiyaba subung la braha dong? Niyalaiba blaiyaba duha braha dong? Madai ning hapsao ni gyan khe gibir slamya na somo?

²¹ Madai ni gyan khe hapsao ni gyan yaowai hi Madai khe mithi phuya bani yaohon ha jing grao thiyaba khe gibir jasi yaowai hi, bo lonyarao ni sogoma khe Madai ning hamsi ning khaja du.

²² Judarao de sin sain re, Greekrao de gyan khe smai re.

²³ Thikhabo jing de Krista dikphajao bani grao khe thi du. Bo se Judarao ni khlai hi khuda hi galaiyaba se, Jentailrao ni khlai hi de gibir jaba se.

²⁴ Judaraobo ja thing, Jentailraobo ja thing, longjaoyarao ne khlai hi Krista de Madai ni raothai jang Madai ni gyan se.

²⁵ Madai ni gede gibir jayaba de subung gyan thanebo gyan jadaoyaba se. Madai ni gede raoyayababo subung bol raoyaba thane raodao.

²⁶ Daphlungrao, nisi ni longjaothai khe bao ha sang; habsao ni suthai hade nisi ni bising ha gabang de nisi gyani subung niya, gabang de nisi raothai gnangbo niya, nisi nokhor gedeba ni nohkhor ha hajaiyaba bo niya.

²⁷ Thikhabo, subung gyanirao khe laji phnu mani khlai hi Madai ning habsao ni gibirrao khe bo saikho hi, bo raoyayarao khe laji phnu mani khlai hi habsao ni raoyayarao khe se bo saikho ba.

²⁸ Habsao ni jinis hamya ode muji jaoyayaba buthu, ode jinis giriyaba buthu khe sosi bo saikho hi, jinis dongblaiyaba buthu khebo musi niya ja riphu mani khlai hi naislejao hi dongyarao, jinis giriyaba buthu sosi bo slam ba se.

²⁹ Odebani, Madai ni sagang ha subung saosibo sangga phu nang niya.

³⁰ Madai de Krista Jisu ha nisi ni hayu ni bugung se, Krista Jisu de jinthane khlai hi Madai ni phrang gyan ja thing, dormo ja thing, gathar khlaiyaba ja thing, odehe khoyaba japhai kha.

³¹ Odebani, bonsi reb ba lai ning, Sere sanggama nangjao du, bo Gabra ha sangga la thing.