1 JOHN 5 - DARA GADAIN N.T. with PSA and PRO (BSI)

Habsao deyaba lonma se

¹ Sere Jisu khe Krista thi hi lon du, bo Madai niha hajaiba se, odehe sere basa maiyaba khe hamjao du, bo jar ni basa khebo hamjao re.

² Madai ni basathu khe jing hamjao du thi hi jing tharmaiyaba ebo se: Madai khe jing khasao hi, bo grao riyaba buthu khe jing mani kha.

³ Madai khe jing maniyaba ebo ning ja kha: bo grao riyaba buthu khe jing mani du; bo grao riyaba buthu de duya.

⁴ Madai niha hajaiyaba si de habsao khe bonsi de du. Ode ebo ning habsao khe deyaba se, jini lonma ning.

⁵ Jisu khe Madai ni basa se thi hi lonyaba khe garhi sere habsao khe de re?

Jisu Krista ni balam ha sakhi riyaba

⁶ Dih jang thijao ha phaiyaba de Jisu Krista se, dih jang se ning niya hi, dih jang thijao ha jayaba se. Bokhe sakhi riyaba de Bese ning ja kha, Bese de grao gibiyaba se.

⁷ Bonsi sakhi riyaba gatham dong:

⁸ Bese jang dih ar thijao, bo matham de mili du.

⁹ Subung ni sakhi khe ning jing mani kha la, Madai ni sakhi la ar dedaoyaba se, Madai ni sakhi ebo se: Bo jar ni basa ni balam ha sakhi ri du.

¹⁰ Madai ni basa khe lonyaba jar ni ha ning boni sakhi dong la du. Thikhabo, Madai khe lonyayarao Madai ning jar ni basa ni balam ha bonsi ni sakhi riyaba khe bonsi lonyaba ni bokhe bonsi mosol slam du.

¹¹ Odehe, ebo ning boni grao khe sakhi ri ba se: Madai ning boni thaoglao ni hayu khe jinthane ri kha, bo hayu de basa niha dong.

¹² Sere basa khe mai kha, bo hayu mai kha; sere Madai ni basa khe maiya bo hayu khe maiya.

Thaoglao ni hayu

¹³ Thaoglao ni hayu mai kha thi hi nisi mithi phu mani khlai hi, nisi Madai ni basa ni bumu khe lonyarao niha ebo grao khe ang reb ba se.

¹⁴ Ode ebode boni basao ha jini khah de ma se; asaba khe bo boni nangjaothai lai jing sain khade, jing sainyaba khe bo gainsong du.

¹⁵ Jing sainyaba khe bo gainsong du thi hi jing mithi du bani, boni ha jing jinis sainyaba buthu khe mai du thihi bo tharmai du.

¹⁶ Sere jar ni daphlung thihma nang si phap khusi dangyayaba nu khade, bonthane sain ri nang, Madai ning bokhe hayu ri ma se. Ebode thima nang si phap khusi dangyayaba ni khlai hi se. Thima nang si phap dong, olei khusi dangyaba ne Madai bi rima nang ma thihi ang thiya.

¹⁷ Khrip hamya khusi dangyaba de phap gajai se; bede thikhade thima nang si niyayaba phap bo dong.

¹⁸ Sere Madai niha hajai kha phap khusi dangya kha thihi jing mithi du; Madai niha hajai kha bokhe bo dimkhao du, subung hamyayaba de bokhe dopha phuya.

¹⁹ Jing Madai ni basathu se thihi jing mithi du, odehe habsao bubim jang ebo subung phaphi ni hukhum bakhla ha se dongba thihibo jing mithi du.

²⁰ Madai ni basa phai hi, Madai gibiyaba khe tharmai phu mani khlai hi, bujima khe jinthane bo ri kha thihibo jing mithi kha. Ode, jingbo boni Jisu Krista ha jing donghi, subung gibi jahi se jing dong ba. Bode Madai gibiyaba se, thaoglao ni hayubo bo ning.

²¹ Ansarao, saokhuli ni phrang jar khe dimkhao lah.