Zaburi 98 - Digo Bible

Mlungu ndiye mtawala wa dunia yosi

Zaburi.

¹ Muimbireni Mwenyezi Mlungu wira muphya mana akahenda mambo ga ajabu! Mkpwonowe wa kulume na mkpwonowe mtakatifu, akaphaha ushindi.

² Mwenyezi Mlungu akahenda ushindiwe umanyikane, akaonyesa hakiye kpwa mataifa ganjina.

³ Akatambukira mendzwaye isiyosika na uaminifuwe kpwa nyumba ya Aiziraeli. Dunia yosi ikawoona ushindi wa Mlungu wehu.

⁴ Mshangiliyeni Mwenyezi Mlungu, dunia yosi, muimbireni mawira ga kumtogola na njerejere.

⁵ Imbani mawira ga kumtogola Mwenyezi Mlungu mchihumira zeze. Imbani kpwa kuhumira zeze na sauti za mtswano.

⁶ Mpigireni njerejere Mwenyezi Mlungu, mfalume wehu mshangiliyeni kpwa tarumbeta na mumpigire magunda.

⁷ Bahari naivume na vyosi virivyo mumo, dunia na osi anaosagala mumo.

⁸ Myuho naipige makofi, myango nayiimbe phamwenga na raha,

⁹ mbere za Mwenyezi Mlungu, mana aredza aamule dunia. Andaamula dunia na haki na mataifa kpwa usawa.