Zaburi 87 - Digo Bible

Raha ya kusagala Sayuni

Zaburi ya atu a chivyazi cha Kora. Wira.

¹ Mwenyezi Mlungu wadzenga mudziwe dzulu ya mwango mtakatifu.

² Mwenyezi Mlungu anamendza maryango ga Sayuni, kuriko makalo gosi ga Jakobo.

³ Mambo ga nguma ganagombwa kuhusu uwe, ee mudzi wa Mlungu.

⁴ Kahi za hinyo animanyao, ni Rahabu na Ababeli. Piya kuna Afilisti na Atiro, phamwenga na Akushi, na anaamba, “Hiyu wavyalwa Sayuni.”

⁵ Na kuhusu Sayuni atu andaamba “Hiyu na yuya avyalwa mumo, mana Iye Ariye Dzulu Kuriko Vyosi andauimarisha.”

⁶ Mwenyezi Mlungu andaika kumbukumbu wakati ndiphoandikisha atu, “Hiyu wavyalwa Sayuni.”

⁷ Anaoimba na anaofwiha piya anaamba, “Sayuni ndicho chandzo cha baraka zehu.”