Zaburi 86 - Digo Bible

Kuvoya msada

Voyo ra Daudi.

¹ Niphundza, ee Mwenyezi Mlungu na unijibu, mana ni mchiya na mgbwayi.

² Nirinda mana ni muaminifu kpwako. Mtivye mtumishio akukuluphiraye. Uwe u Mlungu wangu.

³ Nionera mbazi, ee Mwenyezi Mlungu, mana ninakuririra dii yosi.

⁴ Henda moyo wa mtumishio uhererwe, mana moyo wangu nauelekeza kpwako, ee Mwenyezi Mlungu.

⁵ Mana uwe, ee Mwenyezi Mlungu, u mnono na unaswamehe hinyo akuvoyao unaaonyesa mendzwa isiyosika.

⁶ Phundza mavoyo gangu, ee Mwenyezi Mlungu, phundza chiriro changu nikuvoyapho.

⁷ Siku nchikala tabuni nindakuiha, mana uwe undanijibu.

⁸ Kahi ya milungu yosi takuna ariye dza uwe, ee Mwenyezi Mlungu wala awezaye kuhenda dza gago uhendago uwe.

⁹ Mataifa ganjina gosi urigoumba gandakpwedza gakusujudiye, ee Mwenyezi Mlungu, na gandaripha nguma dzinaro.

¹⁰ Mana uwe u mkpwulu na unahenda mambo ga ajabu. Uwe macheyo u Mlungu.

¹¹ Nifundza njirayo, ee Mwenyezi Mlungu, ili niweze kunyendeka kahi ya ukpwelio. Nipha moyo usiositasita, ili niweze kuishimu dzinaro.

¹² Nindakutogola moyo kutsuka, ee Mwenyezi Mlungu, Mlungu wangu. Nindaripha nguma dzinaro hata kare na kare.

¹³ Mana mendzwayo ni nyinji kpwangu, ukakombola nafsi yangu na kuzimu.

¹⁴ Ee Mlungu, atu ayi ananishambuliya, atu asiojali analonda kuniolaga, na taakujali.

¹⁵ Ela uwe, ee Mwenyezi Mlungu, u Mlungu wa huruma na mbazi, kureya upesi na u tele mendzwa isiyosika na uaminifu.

¹⁶ Kala uphande wangu unionere mbazi, muphe mkpwotse mtumishio umtivye mwana wa mtumishio wa chichetu.

¹⁷ Nionyesa ishara ya unonoo ili hinyo anaonizira aone na agbwirwe ni haya mana uwe Mwenyezi Mlungu ukaniterya na kuniphoza marenda.