Zaburi 85 - Digo Bible

Kuvoyera Iziraeli itiviwe

Kpwa chilongozi wa aimbadzi. Zaburi ya atu a Kora.

¹ Ee Mwenyezi Mlungu, ukaonera mbazi atu a tsiiyo, ukahenda chivyazi cha Jakobo chiongokerwe.

² Waaswamehe atuo kosa rao, dambi zao zosi uchizifuta!

³ Wausa tsukizizo zosi, na uchiricha tsukizizo kali.

⁴ Huhende huongokerwe tsona, ee Mlungu Muokoli wehu, uriche kuutsukirirwa.

⁵ Dze, undahureyera hata kare na kare. Ukale tsukizizo zindaenderera hata vivyazi vyosi?

⁶ Dze, kundahutiya nguvu tsona ili swiswi atuo, huhamirwe ni uwe?

⁷ Huonyese mendzwayo isiyosika, ee Mwenyezi Mlungu, na uhuphe wokofu.

⁸ Nanisikire ndigogomba Mwenyezi Mlungu mana anaahidi amani kpwa atue, atumishi aaminifu. Ela naasiuyire uzuzu wao.

⁹ Hakika iye a tayari kutivya hinyo amuogophao, ili ngumaye isale kpwenye tsi yehu.

¹⁰ Mendzwa isiyosika na uaminifu vindakutana. Haki na amani vindadonerana.

¹¹ Uaminifu undazuka kula photsi na haki indatsungurira kula mlunguni.

¹² Ee, Mwenyezi Mlungu andahurehera mambo manono, nayo tsi yehu indalavya mavuno manji.

¹³ Haki indamtanguliya Mlungu na kumtengezera njira.