Zaburi 84 - Digo Bible

Hamu ya kukala nyumbani mwa Mlungu

Kpwa chilongozi wa aimbadzi. Kuhumira sauti ya Gitithi. Zaburi ya atu a chivyazi cha Kora.

¹ Makalogo ni manono ajabu, ee Mwenyezi Mlungu, Mlungu wa majeshi.

² Moyo wangu unaaza sana, yani unazimiya kpwa hamu ya kusagala muhalani pha Mwenyezi Mlungu; Moyo wangu na mwiri wangu unamuimbira na raha Mlungu ariye moyo.

³ Hata mberya nkuphaha makalo, na mbayumbayu ana chidzumbache ambapho anaweza kuika vidzanavye, phephi na phatu pha kulavira sadaka, ee Mwenyezi Mlungu, Mlungu wa majeshi, mfalume wangu na Mlungu wangu.

⁴ Baha hinyo asagalao mwako nyumbani na kukuimbira mawira ga kukutogola chila wakati!

⁵ Baha ambao mkpwotse wao ula kpwako. Aazao njira ziphiyazo Sayuni.

⁶ Anaphotsupa Dete ra Baka risiro madzi, nkurihenda rikale na pula za madzi na mvula za mapema nkurihenda rikakala na vidimbwi vya madzi.

⁷ Anaenderera kuphaha nguvu zaidi na zaidi Mlungu mkpwulu kushinda milungu yosi andaonekana Sayuni.

⁸ Ee Mwenyezi Mlungu, Mlungu wa majeshi, sikira mavoyo gangu, niphundza, uwe Mlungu wa Jakobo!

⁹ Ee Mlungu, tundza vinono ngao yehu, mlole na mbazi iye uriyemmwagira mafuha.

¹⁰ Mana siku mwenga phako mihalani ni bora kuriko siku elufu phatu phanjina. Ni baha nikale mrindzi wa ryango ra nyumba ya Mlungu wangu kuriko kusagala hema za atu ayi.

¹¹ Mana Mwenyezi Mlungu ni dzuwa na ni ngao, nkuhupendeleya na kuhujaliya ishima. Mwenyezi Mlungu kaalafya chochosi chiricho chinono hinyo ahendao garigo sawa.

¹² Ee Mwenyezi Mlungu, Mlungu wa majeshi, baha hiye akukuluphiraye.