Zaburi 79 - Digo Bible

Wira wa kuvoyera tsi ikombolwe

Zaburi ya Asafu.

¹ Ee Mlungu, atu a mataifa ganjina akavamia tsiiyo, akatiya najisi nyumbayo takatifu ya kuvoya Mlungu, Jerusalemu akaihenda ikale gandzo.

² Nyufu za atumishio akazirichira nyama a mapha ahende chakurya, miri ya atuo atakatifu ikarichirwa ikale chakurya cha nyama a tsakani.

³ Amwaga milatso yao dza madzi mo Jerusalemu, na taphakarire yeyesi wa kuazika.

⁴ Hukakala utu wa kutsekpwa, kunyeterwa ni majirani, na kuchengbwa ni hinyo auzungulukao.

⁵ Ee Mwenyezi Mlungu, undatsukirwa hadi rini? Dze, undatsukirwa hata kare na kare? Dze, tsukizizo za wivu zindaaka dza moho hadi rini?

⁶ Tsukizizo zimwagire atu a mataifa ganjina asiokumanya na uimwage dzulu ya falume za atu asioadamira dzinaro.

⁷ Mana akaolaga atu osi a chivyazi cha Jakobo na kubananga makalo gao.

⁸ Usihutiye adabu kpwa sababu ya makosa ga akare ehu, huonere mbazi vivi kare mana hukatsowekpwa.

⁹ Huterye, ee Mlungu, muokoli wehu, kpwa sababu ya utukufu wa dzinaro, hukombole na uhuswamehe dambi zehu, kpwa ishima ya dzinaro.

¹⁰ Kpwa utu wani mataifa ganjina gaambe, “Akuphi ye Mlungu wao?” Hebu riphiza mlatso wa atumishio na imanyikane wazi kpwa mataifa ganjina na mbere zehu!

¹¹ Kuula kpwa mabusu nakukufikire humira uwezoo mkpwulu kuarinda hinyo arioamulwa kuolagbwa!

¹² Ee Mwenyezi Mlungu, ariphize kano sabaa, atu a mataifa jirani kpwa sababu ya kulaphiza ariookulaphiza.

¹³ Halafu ndipho naswi atuo, mangʼondzi ugarisago, hundakulavira shukurani hata kare na kare, kula chivyazi chimwenga hadi chanjina hundakutogola siku zosi.