Zaburi 78 - Digo Bible

Mlungu na atue

Wira wa Asafu.

¹ Phundzani mafundzo gangu, mwi atu angu, masikiro genu na gasikize maneno ga mromo wangu!

² Nindabisha namwi kpwa kuhumira ndarira, nindagomba maneno ga siri za hangu kare.

³ Mambo ambago hwagasikira na kugamanya, mambo hurigoambirwa ni akare ehu.

⁴ Gago tahundafwitsa ana ehu, hundasemurira chivyazi chedzacho mahendo ga nguma ga Mwenyezi Mlungu, na uwezowe na mambo ga ajabu arigohenda.

⁵ Waapha malagizo atu a Iziraeli, chivyazi cha Jakobo wachipha malagizo. Walagiza akare ehu aafundze ana ao,

⁶ ili chivyazi chedzacho chidzifundze kula kpwao nao edze aambire ana ao.

⁷ Chihivyo nao piya andamkuluphira Mlungu na taandayala gara achigohenda, ela agbwire malagizoge siku zosi.

⁸ Taandakala dza akare ao, atu a mioyo mifu na aasi, ambao tayamuamini Mlungu chikamilifu na taayakala aaminifu wakati wosi.

⁹ Dzagbwe Aefuraimu akala na maha, aho achimbira viha.

¹⁰ Taayagbwira chilagane cha Mlungu, arema kugbwira shariyaze.

¹¹ Ayala gara garigohendwa ni Mlungu na vilinje ambavyo kala akaaonyesa.

¹² Mlungu wahenda vilinje mbere za akare ao, hiko tsi ya Misiri, seemu za Soani.

¹³ Waahula njira baharini na achiahenda atsupe, wahenda madzi gaime dza kuta.

¹⁴ Wakati wa mutsi waalongoza na ingu, na usiku wosi waalongoza na mwanga wa moho.

¹⁵ Waahula myamba hiko jangbwani achiapha madzi kpwa unji dza madzi ga bahari.

¹⁶ Wahenda vidzuho kula mwambani, na achihenda madzi gajere dza myuho.

¹⁷ Ela phamwenga na vivyo, aenderera kuhenda dambi kpwa kumuasi Iye Ariye Dzulu Kuriko Vyosi ko jangbwani.

¹⁸ Amjeza Mlungu kusudi kpwa kuvoya chakurya arichokala na kpwiru nacho.

¹⁹ Agomba chinyume cha Mlungu achiamba, “Kale Mlungu anaweza kuhuandazira chakurya ku weruni?

²⁰ Ni kpweli, iye wapiga mwamba, madzi gachihumbuka na myuho ichifurika. Kale iye andaweza kuapha atue chakurya au kuapha atue nyama?”

²¹ Hipho Mwenyezi Mlungu ariphosikira hivyo wareya sana moho wa tsukizize uchiocha atu a chivyazi cha Jakobo tsukizize zichiamenyerera atu a Iziraeli.

²² Kpwa sababu taayamuamini Mlungu na taayamkuluphira kukala anaweza kuativya.

²³ Ela walagiza kuko dzulu, na achivugula miryango ya mlunguni,

²⁴ Achiamwagira manna dza mvula kula dzulu ili arye, waapha mtsere kula mlunguni.

²⁵ Anadamu achirya chakurya cha malaika, naye waapha chakurya cha kukola.

²⁶ Iye wasababisha phepho ra mlairo wa dzuwa ripige kula mlunguni, na kpwa uwezowe achituluza phepho ra mwakani.

²⁷ Waamwagira nyama dza vumbi, nyama a mapha anji dza mtsanga wa baharini.

²⁸ Nyama hinyo a mapha arichwa agbwe mo mwao kambini na kuzunguluka go mahema gao.

²⁹ Phahi arya kumvuna mana waapha chira arichokala na kpwiru nacho.

³⁰ Ela kabila kpwiru yao taidzangbwesira, wakati chakurya chichere mwao miromoni,

³¹ tsukizi za Mlungu zichiedzera chinyume chao, achiaolaga hara ariokala na nguvu kahi zao achibwaga mabarobaro ga Iziraeli.

³² Ela phamwenga na gago gosi aenderera kuhenda dambi, dzagbwe waahendera mambo ga ajabu, aho taayaamini.

³³ Kpwa hivyo achihenda siku zao zisire upesi dza mseho, na miaka yao isire upesi na vifo vya gafula.

³⁴ Chila ariphoaolaga, hinyo ariosala amuendza Mlungu, atubu achimuendza Mlungu kpwa chadi.

³⁵ Atambukira kukala Mlungu ndiye mwamba wao, Iye Ariye Dzulu Kuriko Vyosi ndiye mkomboli wao.

³⁶ Ela amchenga kpwa maneno gao, achigomba handzo kpwa kanwa zao.

³⁷ Taayakala aaminifu kpwakpwe, taayakala aaminifu kpwa chilaganeche.

³⁸ Hata hivyo kpwa kukala iye ni wa mbazi, waaswamehe uyi wao, wala kayaangamiza, wazuwiya tsukizize hipha na hipha, wala kayadziricha apandwe ni asira.

³⁹ Watambukira kukala aho ni atu tu, dza phepho ripigaro richitsupa na tariuya tsona.

⁴⁰ Amkosera adabu kano ngaphi amuasi ko weruni na achimsononesa ko jangbwani?

⁴¹ Amjeza Mlungu kano kpwa kano achimchokoza Mtakatifu wa Iziraeli.

⁴² Taayatambukira kukala iye ana uwezo wala kutambukira hira siku ariphoativya kula kpwa aviha ao,

⁴³ ariphohenda isharaze ko Misiri na mahendoge ga ajabu hiko seemu ya Soani.

⁴⁴ Achigaluza myuho yao ichikala milatso, ili asiweze kunwa madzi ga vidzuho vyao.

⁴⁵ Waahumira maipho ga maindzi gachiapashira na magula, garigoahenda asikale na amani.

⁴⁶ Mimea yao wairichira makunyati na mavuno ga kazi yao achigarichira ndzije.

⁴⁷ Wabananga mizabibu yao na mvula ya mawe na mikuyu yao achiibananga na mnyevu kali.

⁴⁸ Ngʼombe zao waziolaga na mvula ya mawe, na achihenda mifugo yao ipigbwe ni limeme ra chiguruguru.

⁴⁹ Waricha tsukizize kali ziake dzulu yao, warichira tsukizize, utsunguwe na mashaka phamwenga na kuahumira kundi ra malaika anaoangamiza atu.

⁵⁰ Tsukizize wazitengezera njira kayaativya na chifo ela waaolaga na ukongo mui.

⁵¹ Waolaga ana a kpwandza a chilume a Amisiri yani matunda ga kpwandza kahi za mahema ga Hamu.

⁵² Halafu waatuluza atue dza mifugo achialongoza dza mangʼondzi kutsupira weruni.

⁵³ Waalongoza salama, hata taogophere ela bahari ichihosa maadui gao.

⁵⁴ Achiareha hadi kpwenye mphaka wa tsiiye takatifu, ko tsi ya myango ariyoishinda na mkpwonowe wa kulume.

⁵⁵ Wazola atu a mataifa ganjina mbere zao, achiaganyira tsi zao zikale urisi wao, achihenda mbari za Iziraeli kahi ya midzi yao.

⁵⁶ Ela phamwenga na vivyo, aho amjeza na achimuasi Mlungu Ariye Dzulu Kuriko Vyosi na taayalunga malagizoge.

⁵⁷ Badalaye agaluka achihenda mai dza akare ao, akosa kukuluphirika dza uha urio na kasoro.

⁵⁸ Mana amreyeza Mlungu kpwa hizo seemu zao za dzulu za kuabudira milungu amtiya Mlungu wivu na vyo vizuka vyao vya kudzitengezera.

⁵⁹ Mlungu ariphoona, achitsukirwa sana, achikahala Iziraeli tsetsetse.

⁶⁰ Waricha makaloge hiko Shilo, hema ambamo wasagala kahi za atu.

⁶¹ Waricha sanduku ra nguvuze rihalwe kuphirikpwa utumwani utukufuwe mikononi mwa adui.

⁶² Waatsukirirwa sana atue achiaricha aolagbwe kpwa upanga.

⁶³ Moho uchiaocha ana aho alume nao ana aho achetu achikosa achumba.

⁶⁴ Alavyadzi-sadaka aolagbwa vihani wala magungu aho taayaweza kuasononekera.

⁶⁵ Halafu Mwenyezi Mlungu walamuka dza alaye usingizini, dza mutu jasiri achiyechangamshwa ni uchi.

⁶⁶ Achizola maaduige, achiatiya waibu hata kare na kare.

⁶⁷ Iye achirema chivyazi cha Yusufu, wala kayatsambula mbari ya Efuraimu.

⁶⁸ Badalaye watsambula mbari ya Juda, Mwango wa Sayuni, anaoumendza.

⁶⁹ Achidzenga phatuphe phatakatifu dza dzulu mlunguni, achikuhenda imara dza arivyohenda dunia hata kare na kare.

⁷⁰ Wamtsambula Daudi mtumishiwe, yekala mrisa wa mangʼondzi,

⁷¹ kula arikorisa mangʼondzi na vidzana ngʼondzi achimreha edze akale mrisa wa chivyazi cha Jakobo, Aiziraeli, atu a Mlungu.

⁷² Naye waaroroma na ukamilifu na achialongoza kpwa ujuzi wa mikonoye.