Zaburi 73 - Digo Bible

SEEMU YA HAHU Haki indatawala

Zaburi ya Asafu.

¹ Hakika Mlungu ni mnono kpwa Aiziraeli, kpwa hinyo ariotsuka mioyo.

² Ela mino chidide nidzikpwale kala bado chidide nihereze.

³ Mana kala naaonera wivu hinyo anaodzikarya niriphoona atu ayi anaongokerwa.

⁴ Mana taaona tabu miri yao ina afya na nguvu.

⁵ Taana shida dza atu anjina, taateseka dza atu anjina.

⁶ Kpwa hivyo kpwao kuhenda shobo ni dza kuvwala mkpwufu singoni na kuaonyesa ayawao ukatili ni dza nguwo za kuvwala.

⁷ Mioyo yao mii, nkuaza kuhenda uyi na mioyo yao i tele mipango mii.

⁸ Nkutenda ayawao na kugomba mai nkuhenda ngulu na kupanga kuonera ayawao.

⁹ Nkulaphiza Mlungu ariye mlunguni na kuamrisha atu na jeuri dunia yosi.

¹⁰ Kpwa hivyo atu nkugaluka na kuasifu wala taaona kukala na kosa rorosi.

¹¹ Nao nkuamba, “Mlungu andamanyadze? Dze, Ye Ariye Dzulu Kuriko Vyosi ana marifwa?”

¹² Sambi hivi ndivyo arivyo atu ayi ana chila alondacho na anaenderera kuphaha zaidi.

¹³ Kale nkahenda kazi ya bure kukala na roho swafi na kusahenda dambi?

¹⁴ Mana nateseka dii yosi na chila ligundzu natiywa adabu.

¹⁵ Kalapho nagomba hivyo kpwao ningekala wa handzo hata kpwa chivyazi cha ana ao.

¹⁶ Niriphojeza kufikiriya dzambo hiri rakala gumu sana kpwangu.

¹⁷ Hadi nriphomenya phatupho phatakatifu ndipho nchimanya ndigoafika atu ayi.

¹⁸ Kpwa kpweli unaaika phatu phanaphoereza, unaahenda agbwe na kuangamia.

¹⁹ Anaangamizwa gafula na kutsuphiwa kure kpwa vitisho.

²⁰ Uwe uchiunuka, ee Mwenyezi Mlungu nyo nkuyaya mara mwenga dza ndoso iyayavyo mutu achilamuka kula usingizini.

²¹ Moyo wangu uriphokala na utsungu, na roho kudunga,

²² nriphokala mzuzu na nsiyemanya rorosi nakala dza nyama wa weruni phako matsoni.

²³ Hata hivyo ni phamwenga nawe siku zosi, ee Mlungu! Uwe ukanigbwira mkpwono wangu wa kulume.

²⁴ Uwe unanilongoza kutsupira mashauri unagonipha na mwishirowe undaniphokera katika utukufuo.

²⁵ Hiko mlunguni sina yeyesi wa kuniterya isiphokala uwe, na hipha duniani sina nnachoaza isiphokala uwe.

²⁶ Mwiri wangu na moyo wangu vinaweza kushindwa, ela Mlungu ndiye autiaye nguvu moyo wangu na ndiye mtalo wangu hata kare na kare.

²⁷ Hiye adzitengaye nawe kpwa kpweli andaangamia anayekutsamalala, undamuangamiza.

²⁸ Ela kpwangu ni vinono kukala phephi na Mlungu, Mwenyezi Mlungu ndiye chimbiriro rangu, nindatangaza gosi urigohenda.