Zaburi 69 - Digo Bible

Voyo ra kulonda msada

Kpwa chilongozi wa aimbadzi. Kuhumira sauti ya “Matoro.” Zaburi ya Daudi.

¹ Nitivya, ee Mlungu! Mana madzi gakanifika singoni.

² Nkazama matopeni, sina hata phatu pha kuvyoga. Nkafika chivwani na mafuriko gananibwiningiza.

³ Kurira kpwangu kukaniremweza, umiro wangu ukafuwa. Nikamgodza Mlungu wangu hata ndipho matso gangu gaona wiziwizi.

⁴ Hinyo anaonizira bila sababu ni anji kuriko isabu ya nyere za chitswa changu. Hinyo anaolonda kuniolaga ana nguvu sana, hinyo anaonishambuliya na mambo ga handzo. Nalondwa niuyize chitu ambacho siiyire.

⁵ Ee Mlungu, uwe unamanya uzuzu wangu, makosa gangu tagakafwitswa usigaone.

⁶ Usiriche hinyo akukuluphirao aphahe waibu kpwa sababu ya chigoniphaha, Ee Mwenyezi Mlungu, Mlungu wa majeshi, usiriche hinyo anaokuendza akakosa kuishimiwa kpwa sababu yangu, ee Mlungu, wa Iziraeli.

⁷ Mana mino nkakoserwa ishima na kuphaha waibu kpwa sababuyo.

⁸ Nkakala mjeni kpwa enehu anangbwa a mayo ananiona avi ni mutu yela kure.

⁹ Mana iyo mendzwa nriyo nayo kpwa sababu ya nyumbayo inanirya, na higo matusi ga hinyo anaokulaphiza gakanigbwerera.

¹⁰ Niriphofunga ili roho yangu inyenyekee atu anilaphiza.

¹¹ Niriphovwala magunia kpwa sonono atu aninyetera.

¹² Atu achisagala achibisha ananihadza mimi, anwadzi uchi nao anatunga mawira kuniimba mimi.

¹³ Ela mino nakuvoya uwe ee Mwenyezi Mlungu, kahi za wakati unaoukubali uwe, ee Mwenyezi Mlungu, kahi za mendzwayo isiyosika, nijibu uniterye kpwa uaminifuo.

¹⁴ Niokola nisizame topeni nitivya na maadui gangu na madzi manji.

¹⁵ Usiriche mafuriko gakanibwiningiza au chivwa chikanimiza au dibwa rikanibwiningiza.

¹⁶ Nijibu ee Mwenyezi Mlungu, kpwa sababu ya mendzwayo nono isiyosika, nigalukira mimi kulengana na unji wa mbazizo.

¹⁷ Usimfwitse usoo mtumishio, naona tabu, hala-hala unijibu.

¹⁸ Sengera phephi nami unikombole, niokola na aviha angu!

¹⁹ Uwe unamanya ninavyolaphizwa na aibu yangu na kukoserwa ishima, aviha angu osi unaamanya.

²⁰ Kulaphizako kunanivundza moyo, hata sina tamaa tsona. Naendza huruma ela kala takuna nchiendza atu akuniphoza roho siphahire.

²¹ Anirisa sumu kama chakurya, na achininwesa digbwa ili kuniusira chiru.

²² Sikukuu zao nazikale mihego kpwao, na sikukuu zao za sadaka za kutsindza ziagbwire.

²³ Matso gao nagatiwe jiza ili asione, na myongo-myongo yao naimyoke siku zosi.

²⁴ Amwagire tsukizizo na tsukizizo kali ziagute.

²⁵ Kambi zao nazikale gandzo, asisagale mutu yeyesi katika mahema gao.

²⁶ Mana anaagayisa hinyo urioatiya adabu, na hinyo urioatiya vironda anaalumiza zaidi.

²⁷ Atiye adabu kpwa sababu ya chila uyi wao usiaswamehe bii.

²⁸ Afute kpwenye chitabu cha ario moyo, asikalemo kahi za isabu ya enye haki.

²⁹ Ela mino ninagaya na nasikira unyonje niunula unitivye, ee Mlungu!

³⁰ Nindaimba wira wa kutogola dzina ra Mlungu. Nindamtogola na shukurani.

³¹ Dzambo hiri rindamhamira Mwenyezi Mlungu kuriko kumlavira sadaka ya ngʼombe, wala ndzau phamwenga na pembeze na makpwatsage.

³² Hinyo anaoonerwa na aone na akale na raha, nao anaomuishimu Mlungu, mioyo yao indaphaha nguvu.

³³ Mana Mwenyezi Mlungu nkusikira mavoyo ga achiya, na kabera ario akpwe achiofungbwa.

³⁴ Mlungu na dunia navimtogole Mlungu, bahari na chila chitu chinyendekacho himo piya navimtogole Mlungu.

³⁵ Mana Mlungu andativya Sayuni na kudzenga midzi ya Juda na atumishie andasagala himo na kuimiliki.

³⁶ Ana a atumishie andairisi na hinyo ammendzao.