Zaburi 68 - Digo Bible

Wira wa kumtogola Mlungu na kumshukuru

Kpwa chilongozi wa aimbadzi. Zaburi ya Daudi. Wira.

¹ Mlungu naaunuke avihae atsamukane, hinyo ariomzira naazole kure naye!

² Aphepheruse dza mosi uphepheruswavyo ni phepho, hinyo ayi na aangamizwe ni Mlungu, dza mshumaa utsatsamuswavyo ni moho.

³ Ela atu a haki naahererwe naashangiliye mbere za Mlungu! Naashangiliye na kuimba na raha!

⁴ Muimbireni Mlungu, imbani sifwa za dzinare mtengezereni njira iye atsupaye dzulu ya maingu, dzinare ni Mwenyezi Mlungu, hererwani kpwa sababuye.

⁵ Mlungu, asagalaye kpwenye makaloge matakatifu, ni baba wa anachiya na mrindzi wa magungu.

⁶ Mlungu nkuapha agayi makalo ga kudumu, nkurichira mabusu akaahenda akale na mafwanikiyo ela hinyo asiomendza kulunga shariya andasagala tsi isiyo na chitu.

⁷ Ee Mlungu, uriphoalongoza atuo wakati wa charo ariphonyendeka hiko weruni,

⁸ tsi yasumba, na mlunguni kuchireha mvula, kpwa sababu ya kpwedzako Mlungu wa Sinai, kpwedzako uwe Mlungu wa Iziraeli.

⁹ Uwe Mlungu wahenda mvula inye nyinji tsi yosi, waihenda tsi yiuyize nguvu wakati kala ikatsakala.

¹⁰ Atuo achiphaha makalo gao mumo, katika uzurio, ee Mlungu, uchiashuulikiya achiya.

¹¹ Mwenyezi Mlungu walavya amuri naro jeshi kulu ra achetu achitangaza habari.

¹² “Afalume na majeshi gao anazola ovyo-ovyo!” Achetu madzumbani anaganya nyara.

¹³ Dzagbwe asala mwao vyaani, vizuka vya njiya vyotengezwa na feza, na mapha gao ganangʼala dza zahabu.

¹⁴ Mwenye Nguvu Zosi ariphoatsamula afalume hiko, barafu yagbwa dzulu ya mwango wa Salimoni.

¹⁵ Ee mwango mure, mwango wa Bashani, ee mwango wa virere vinji, mwango wa Bashani.

¹⁶ Ee mwango wa virere vinji, kpwa utu wani unauonera chidzitso mwango ambao Mlungu wamendza ukale makaloge, ambapho Mwenyezi Mlungu andasagala hata kare na kare.

¹⁷ Mwenyezi Mlungu aredza kula Sinai hadi phatuphe phatakatifu na msafara mkpwulu wa magari ga kuvwehwa ni farasi.

¹⁸ Uwe waambuka mwango mure, kuno ukatsukula mateka na kuphokera zawadi kahi za anadamu hata kahi za atu asiolunga shariya ili Mwenyezi Mlungu ukale undasagala kuko.

¹⁹ Naatogolwe Mwenyezi Mlungu, Mlungu ni wokofu wehu, ahutsukuriraye mizigo yehu chila siku.

²⁰ Mlungu wehu ni Mlungu aokolaye, Mwenyezi Mlungu ndiye ariye na njira ya kuhuhenda husifwe.

²¹ Mlungu andavundza vitswa vya maaduige, chirauni cha nyere cha hiye ahendaye mambo garigo ni kosa.

²² Mwenyezi Mlungu waamba, “Nindauyiza maadui kula Bashani, nindaauyiza kula vivwa vya bahari.

²³ Ili magulu genu gaoge milatso ya aviha enu na madiya genu gailambe kumvuna kama mtalo wao.”

²⁴ Vyarovyo vya ushindi, ee Mlungu, vinaonekana vyaro vya Mlungu wangu na mfalume wangu, kuelekeya phatakatifuphe.

²⁵ Mbere kuna aimbadzi nyuma kuna apigadzi ngoma kahi-kahi yao asichana anapiga tamburini.

²⁶ “Mtogoleni Mlungu katika borori, mtogoleni Mwenyezi Mlungu mwi chivyazi cha Iziraeli!”

²⁷ Kpwandza ni Benjamini, mdide wa osi, chisha vilongozi a Juda na kundi rao halafu akulu a Zabuloni na Nafutali.

²⁸ Ee Mlungu, onyesa nguvuyo kulu, nguvu uriyoihumira kpwa ajili yehu.

²⁹ Kula nyumbayo ya kuvoya Mlungu hiko Jerusalemu ambako afalume andakpwedzera na zawadi zao.

³⁰ Ademurire hinyo nyama asagalao Ziyani, kundi ra ndzau na ndama. Avyoge-vyoge hinyo ario na chere ya kodi, atsamule hinyo atu anaohamirwa ni viha.

³¹ Shaba nairehwe kula Misiri, Kushi ahende wangbwi kumuunurira mikono Mlungu.

³² Mwi falume za dunia, muimbireni Mlungu, imbani mawira ga kumtogola Mwenyezi Mlungu.

³³ Muimbireni iye atsupaye mlunguni, Mlungu wa kare na kare, analavya sautiye, sautiye ya nguvu.

³⁴ Mtogoleni Mlungu kukala ana nguvu hiye atawalaye Iziraeli na uwezowe u mlunguni.

³⁵ Mlungu anaogofya hipho phatuphe phatakatifu, Mlungu wa Iziraeli nkuapha atue uwezo na nguvu. Mlungu naatogolwe!