Zaburi 67 - Digo Bible

Wira wa kushukuru

Kpwa chilongozi wa aimbadzi. Kpwa kuhumira vifwaya vya nyugbwe. Zaburi. Wira.

¹ Mlungu hulole na mbazi na hujaliye; hulole na mbazi,

² ili atu a dunia amanye vira ulondavyo, nao atu a mataifa gosi amanye kukala unativya.

³ Atu a makabila gosi naakutogole uwe Mlungu, atu osi naakutogole!

⁴ Atu a mataifa ganjina gosi naahererwe na kuimba na raha, mana anaamula atu bila ubaguzi na kulongoza chila taifa duniani.

⁵ Atu a makabila gosi naakutogole uwe Mlungu, atu osi naakutogole!

⁶ Tsi indavyala mavunoge, mana Mlungu wehu wahujaliya.

⁷ Mlungu naenderere kuhujaliya; atu a dunia ndzima amuogophe.