Zaburi 65 - Digo Bible

Kumtogola na kumshukuru Mlungu

Kpwa chilongozi wa aimbadzi. Zaburi ya Daudi. Wira.

¹ Unafwaha kutogolwa hiko Sayuni, ee Mlungu, atu andakutimizira naziri zao.

² Uwe usikiraye mavoyo! Anadamu osi andakpwedza kpwako kpwa sababu ya dambi.

³ Makosa gehu gachihuzidiya uwe unahuswamehe.

⁴ Baha iye unayemtsambula na kumreha phephi asagale phako muhalani. Hundatosheka na manono ga nyumbayo, nyumbayo takatifu ya kuvoya Mlungu.

⁵ Ee Mlungu, uhutivyaye ukuhujibu na kuhutivya kutsupira mahendogo ga kutisha, uwe uriye kuluphiro ra viumbe vyosi duniani kosi na vya bahari za kure.

⁶ Uwe ambaye kpwa nguvuzo ukaimisa myango kuonyesa una nguvu sana.

⁷ Unahuriza ngurumo za bahari, ngurumo za maimbi, na fujo za atu.

⁸ Aho akalao duniani kosi anaangalazwa ni isharazo, kpwa sababu ya mahendogo unahenda atu ashangiliye na raha mutsi wosi.

⁹ Uwe ukumanyirira tsi kpwa kuimwagira mvula ukuihenda ikale na mtsanga mnono urio na mboleya, muhoo uwe Mlungu, u tele madzi, uwe ndiwe ulavyaye chakurya chao mana hivyo ndivyo urivyopanga ikale.

¹⁰ Minda ukuijaliya na mvula nyinji hadi ikagota madzi, arizi unailainisha pore-pore na kuijaliya mimea ikule.

¹¹ Una hujaliya na mavuno manono wakati wa mwaka. Chila utsapirapho pha tele vitu vinono.

¹² Nyasi za kurisira mifugo weruni zinapwipwita, myango nayo i tele raha.

¹³ Marisani kala mu tele mangʼondzi, madete gakaodzala mtsere chila chitu chinashangiliya na kuimba kpwa raha.