Zaburi 6 - Digo Bible

Voyo ra kulonda kuphozwa

Kpwa chilongozi wa aimbadzi. Kpwa kuhumira vifwaya vya nyugbwe, kpwa sauti ya Sheminithi. Zaburi ya Daudi.

¹ Ee Mwenyezi Mlungu, usinidemurire wakati ukareya, usinitiye adabu wakati ukatsukirwa!

² Nionera mbazi ee Mwenyezi Mlungu kpwa sababu ni mnyonje. Niphoza, mana mifupha yangu inaluma.

³ Nayugika sana mwangu moyoni. Ee Mwenyezi Mlungu, usikae kuniphoza!

⁴ Galuka unitivye; ee Mwenyezi Mlungu, unikombole kpwa ajili ya mendzwayo.

⁵ Atu ariofwa, taakutambukira tsona. Ni ani awezaye kukutogola kula kuzimu?

⁶ Nikaremwa kpwa sababu ya kuula; chila usiku nalwamisa chitanda changu na matsozi, muto wangu ukalwama kpwa chiriro.

⁷ Matso gangu tagaona vinono kpwa sababu ya ndiro, nago ganaona wiziwizi kpwa sababu ya kusononeswa ni aviha angu.

⁸ Niukirani mwi muhendao mai, mana Mwenyezi Mlungu akasikira chiriro changu.

⁹ Mwenyezi Mlungu akasikira chiriro changu, naye akakubali mavoyo gangu.

¹⁰ Maadui gangu gosi gandaifika na kutishirwa sana, nago gandachimbira gafula kpwa waibu.