Zaburi 59 - Digo Bible

Kuvoya urindzi wa Mlungu

Kpwa chilongozi wa aimbadzi. Kpwa sauti ya “Usibanange.” Wira wa Daudi, arioutunga wakati Sauli ariphokala akahuma atu aphiye nyumbani mwa Daudi akamuolage.

¹ Nitivya na maadui gangu, ee Mlungu wangu, nirinda na hinyo anaonishambuliya!

² Nitivya na atu ayi, niokola na aolagadzi!

³ Mana ananiindza aniolage, maadui ga mkpwotse gakakutana anishambuliye, nami sihendere kosa wala dambi, ee Mwenyezi Mlungu.

⁴ Dzagbwe sidzangbwehenda rorosi nyo amaironi kudziika tayari kpwa anivamiye. Unuka wedze ulole na uniterye.

⁵ Uwe Mwenyezi Mlungu, Mlungu wa majeshi ndiwe Mlungu wa Iziraeli. Unuka utiye adabu atu a mataifa, usiriche hata mmwenga wa hinyo apangao mai.

⁶ Chila dziloni nkuuya kuno anapheka dza madiya, na kudengereka mudzi wosi.

⁷ Lola, analaphiza kpweli-kpweli maneno gao avi ni panga kali enye anaona taphana anayesikira.

⁸ Ela uwe Mwenyezi Mlungu unaatseka, unaapuuza hinyo atu anjina asiokumanya.

⁹ Nindakugodzera, uwe uriye nguvu yangu, mana uwe, ee Mlungu, ndiwe ngome yangu.

¹⁰ Mlungu wangu andakpwedza kpwangu katika mendzwaye isiyosika Mlungu wangu andanihenda nturye maadui gangu.

¹¹ Usiaolage mara mwenga sedze atu angu akayala asukesuke kpwa uwezoo ndipho uabwage photsi ee Mwenyezi Mlungu, ngao yehu!

¹² Hinyo nkuhenda dambi kutsupira maneno agombago kpwa hivyo naagbwirwe, kpwa gago agahenderago shobo kpwa sababu ya lana na handzo anarogomba.

¹³ Aangamize katika tsukizizo, aangamize hadi asire tsetsetse ili atu amanye kukala Mlungu anatawala chivyazi cha Jakobo hadi pembe zosi za dunia.

¹⁴ Chila dziloni nkuuya kuno anapheka dza madiya na kudengereka mudzi wosi.

¹⁵ Nkuweha-weha kuendza chakurya napho taashibire nkunguruma.

¹⁶ Ela mino nindaimba kutogola nguvuzo, ligundzu nindaimba na sauti ya dzulu kuhusu mendzwayo isiyosika. Mana uwe ukakala ndiwe ngome yangu na chimbiriro rangu wakati nina tabu.

¹⁷ Nindakuimbira mawira ga kukutogola, uwe nguvu yangu, mana uwe, ee Mlungu, ndiwe ngome yangu, Mlungu unionyesaye mendzwa isiyosika.