Zaburi 58 - Digo Bible

Mlungu ndiye muamuli wa aamuli

Kpwa chilongozi wa aimbadzi. Kpwa mtindo wa “Usibanange.” Wira wa Daudi.

¹ Mwi munaotawala, dze, munaamula kpwa haki? Dze, munaamula anadamu bila ubaguzi?

² Hata, mioyo yenu inapanga mai, mikono yenu inahenda fujo duniani.

³ Atu ayi akoseka hangu ndanini mwa nine zao hinyo akoseka hangu kuvyalwa, agomba handzo.

⁴ Ana sumu dza ya nyoka, ni masito dza fira azibaye masikiroge.

⁵ Ili asisikire sauti za hinyo aihao nyoka au sauti ya mgbwanga mlachu.

⁶ Ee Mlungu, avundze meno gao, gangʼole, ee Mwenyezi Mlungu, meno ga simba hinyo.

⁷ Na ayaye dza madzi gajerago, naavyogbwe-vyogbwe na anyale dza nyasi.

⁸ Naakale dza kovwi ambaye nkutsatsamuka akayaya, naakale dza mimba ichiyovoromoka isione hata dzuwa.

⁹ Naauswe upesi kabila taadzangbweelewa, naangʼolwe dza miya, mimea ya weruni au kpwekpwe, katika tsukizize Mlungu naaphepheruse kure wakati achere moyo.

¹⁰ Atu a haki andahererwa achiona ayi anatiywa adabu, nyayo zao zindavyoga-vyoga iyo milatso ya atu ayi.

¹¹ Atu andaamba, “Kpwa kpweli atu a haki andaphaha tuzo, hakika phana Mlungu anayeamula hipha duniani.”