Zaburi 55 - Digo Bible

Voyo ra mutu agayiswaye

Kpwa chilongozi wa aimbadzi. Kpwa kuhumira vifwaya vya nyugbwe. Wira wa Daudi.

¹ Phundza voyo rangu, ee Mlungu, usinilozere kogo wakati ninakuvoya!

² Niphundza na unijibu shida zangu zikanizidiya, nkaremwezwa

³ ni hoyo ra maadui, na mateso ga atu ayi mana ananirehera tabu na anahamirwa ni kunionyesa uadui na tsukizi.

⁴ Moyo wangu una utsungu munji, natishirwa kpwa sababu naona ndafwa.

⁵ Ninakakama kpwa wuoga, natishirwa sana.

⁶ Mendza kala nina mapha dza njiya, ningeuruka kuphiya kure nchaphaha kuoya.

⁷ Ee, ningephiya kure sana, nchasagala weruni.

⁸ Ningedziendzera pharipho salama phatu pharipho kure na phepho kali na phuto.

⁹ Bananga mipango yao ee Mwenyezi Mlungu, vuruga luga zao, mana naona mudzi ukaodzala atu a fujo na a kumendza kuheha.

¹⁰ Mai higa ganaenderera usiku na mutsi na kusababisha vifo na atu kuhenda vii.

¹¹ Tsi yosi inabanangika, atu anagayisana na kuchengana chila phatu.

¹² Hata siyugbwa ni adui mino kala nigago ningevumirira wala sio kukala nahenderwa mai ni mviha wangu, kala ni hivyo ningedzifwitsa.

¹³ Ela ni uwe, myangu msena wangu, ambaye u msiri wangu.

¹⁴ Enye kala hukabisha ngʼandzi za mtswano, kala huchishuulika phamwenga katika nyumba ya kuvoya Mlungu.

¹⁵ Baha gakafwa higo maadui gangu, kamwe nagaphiye kuzimu kuno ganalola mana mioyo yao ikaodzala uyi.

¹⁶ Ela mino navoya Mlungu, naye Mwenyezi Mlungu andanitivya.

¹⁷ Dziloni, ligundzu hata wakati wa namutsi nalalama na kurira na hiye Mlungu andasikira raka rangu.

¹⁸ Andaikombola roho yangu na viha ninavyopigana nikale salama hata dzagbwe aviha angu ni anji.

¹⁹ Mlungu atawalaye hata kare na kare andaaphundza na aahende anyenyekee, kpwa sababu taalunga shariya na taaogopha Mlungu.

²⁰ Myangu wa mwandzo washambuliya asenae, achivundza chilagane chao.

²¹ Manenoge kala ga laini kuriko siagi, ela mwakpwe moyoni kala anaaza viha, manenoge kala ga laini kutsupa mafuha ela ganakata dza upanga.

²² Gosi ganagokuremerera garichire Mwenyezi Mlungu naye andakuterya hiye kandaricha mutu wa haki aphahe tabu.

²³ Ela uwe Mlungu undaahenda hinyo aolagadzi na atu a handzo avoromoke dibwani hata tsini kabisa kabila ya nusu ya siku zao za kuishi duniani. Ela mino nindakukuluphira uwe.