Zaburi 50 - Digo Bible

Ibada ya kpweli

Zaburi ya Asafu.

¹ Mlungu mwenye nguvu, Mwenyezi Mlungu anagomba anaiha osi asagalao duniani kula mlairo wa dzuwa hadi mtswerero wa dzuwa.

² Mlungu anangʼala na utukufuwe kula Sayuni mudzi ambao unonowe tauna ila.

³ Mlungu aredza na kakala zii, mbereze kuna moho mkali na phuto kali rikamzunguluka.

⁴ Anaiha mlunguni na dunia zedze zikale mashaidi anaphoamula atue.

⁵ Anaamba, “Nikusanyirani atu angu aaminifu, arioika chilagane nami kpwa kulavya sadaka!”

⁶ Ko mlunguni kunatangaza kukala Mlungu ni mwenye haki mana iye mwenye ndiye muamuli!

⁷ Mlungu anaamba, “Sikirani mwi atu angu, nami ndagomba, nindalavya ushaidi wa uyi wenu, mwimwi Aiziraeli. Mimi ndimi Mlungu, Mlungu wenu.

⁸ Sikudemurirani kpwa sababu ya sadaka zenu, wala sadaka za kuochwa munilavirazo chila wakati.

⁹ Mimi sina haja na ndzau kula kpwako chaani wala ndenje kahi za mifugoyo,

¹⁰ mana chila nyama wa tsakani ni wangu phamwenga na ngʼombe zosi kpwenye myango yosi.

¹¹ Nyama osi a mapha naamanya na viumbe vyosi vya mindani ni vyangu.

¹² Ningekala na ndzala, nisingekuambira uwe mana dunia na vyosi virivyo himu ni vyangu.

¹³ Kpwani mino narya nyama za ndzau au kunwa milatso ya mbuzi?

¹⁴ Mlavire Mlungu sadaka ya shukurani, na uuse hatizo kpwa Mlungu Ariye Dzulu Kuriko Vyosi,

¹⁵ alafu nivoya napho ukafikpwa ni shida, nindakukombola nawe undanitogola!”

¹⁶ Ela kpwa atu ayi Mlungu anaauza, “Kpwa utu wani munahadza shariya zangu au kugomba kuhusu chilagane changu?

¹⁷ Mana mwimwi tammendza malagizo gangu na tamgbwira maneno gangu.

¹⁸ Muonapho aivi, munagbwirana nao usena na munashirikiana na azindzi.

¹⁹ Kanwa zenu zi tele uyi na ndimi zenu zinatunga handzo chila wakati.

²⁰ Mkusagala na kugomba mai abari enu, na kuaochera ngulu enenu ndani mwenga.

²¹ Higa gosi mwagahenda mino nchinyamala, mchiona mimi ni dza mwimwi. Ela sambi nakudemurirani na nikuambireni makosa genu chingʼangʼa.

²² Gatiyeni manani gaga, mwi myalao Mlungu, sedze nikakumwamulani mkakosa mutu wa kukutivyani!

²³ Alavyaye sadaka ya shukurani ndiye anayeniishimu, hiye anayelunga njira zangu ndiye ndiyemuonyesa wokofu wa Mlungu.”