Zaburi 44 - Digo Bible

Voyo ra urindzi wa Mlungu

Kpwa chilongozi wa aimbadzi. Wira wa ana a Kora.

¹ Hukasikira na masikiro gehu, ee Mlungu, akare ehu ahusemurira mambo urigohenda wakati wao, pho kare.

² Kpwa kuhumira mkpwonoo, wazola mataifa. Phatu phao uchiphaika akare ehu. Mataifa ganjina wagaangamiza na uchihenda atu ehu aongokerwe.

³ Mana taayahala tsi kpwa kupigana kuhumira panga zao, wala taayaturya maadui gao kpwa mikono yao, ela kpwa uwezoo na nguvuzo na kualola na mbazi kpwa vira kala akakuhamira.

⁴ Uwe ndiwe mfalume wangu na Mlungu wangu unayehenda chivyazi cha Jakobo chiphahe ushindi.

⁵ Kutsapira uwe hunaturya aviha ehu, kpwa dzinaro hunaavyoga-vyoga aviha ehu.

⁶ Mana mino siadamira uha wangu, na upanga wangu tauweza kunitivya.

⁷ Ela uwe ukahutivya na maadui gehu, ukuifya anaohuonera.

⁸ Swino wakati wosi hunashobo kpwa sababu ya Mlungu wehu na hundatogola dzinaro hata kare na kare.

⁹ Ela uwe ukahuricha na ukahuhenda hushindwe ni maadui gehu, kuphiya na majeshi gehu tsona.

¹⁰ Ukahuhenda huchimbire maadui gehu, nao akadziharira mali zehu.

¹¹ Ukahuhenda avi hu mangʼondzi ambago gayatsindzwa ukahutsamula kahi za mataifa ganjina.

¹² Uwe ukaaguza atuo kpwa bei ya rahisi, isiyo fwaida yoyosi.

¹³ Ukahuhenda hukale utu wa kuberwa ni majirani gehu, nao anahunyetera na kuhutseka.

¹⁴ Ukahuhenda hukale ndzimo ya kunyetera kpwa atu a mataifa, anahenda humyosera madomo kpwa chibero.

¹⁵ Mutsi wosi naona waibu, na uso u tele haya,

¹⁶ Kpwa sababu ya maneno ga hinyo anaonibera na kuninyetera, na kpwa sababu ya maadui gangu ganagolonda kuriphiza.

¹⁷ Higa gosi gakahuphaha dzagbwe tahuyakuyala wala kuvundza chilaganecho.

¹⁸ Tahudzangbwerema kugbwira shariyazo, wala kurema kuhenda vira ulondavyo.

¹⁹ Ela ukahuricha tahudziweza kahi za mabawa, ukahubwiningiza na chilungulungu cha jiza.

²⁰ Kalapho kala hukayala dzina ra Mlungu wehu, au huchigolosa mikono yehu kuvoya milungu ya chijeni,

²¹ dze, Mlungu kangegamanya? Mana iye anamanya siri za moyoni.

²² Ela swino hunaolagbwa chila siku kpwa ajiliyo hunahendwa dza mangʼondzi ganagophirikpwa gakatsindzwe.

²³ Lamuka ee Mwenyezi Mlungu, mbona urere? Lamuka! Usihutsuphe hata kare na kare.

²⁴ Mbona unahulozera kogo? Mbona unayala kukala hunagaya na hunaonerwa.

²⁵ Hukazamiswa hadi photsi mtsangani, miri yehu ikagbwirana na photsi.

²⁶ Unuka, wedze uhuterye! Hukombole kpwa sababu ya mendzwayo isiyosika!