Zaburi 41 - Digo Bible

Voyo ra mkpwongo

Kpwa chilongozi wa aimbadzi. Zaburi ya Daudi.

¹ Baha mutu amanyiriraye mchiya, mana Mwenyezi Mlungu andamuokola wakati wa tabu.

² Mwenyezi Mlungu nkumrinda na kumuhenda akale moyo andamuhenda aongokerwe kpwenye yo tsi na kumtivya na maaduige.

³ Napho ni mkpwongo Mwenyezi Mlungu andamterya na kumphoza makongoge gosi.

⁴ Nami nchiamba, “Nionera mbazi, ee Mwenyezi Mlungu, niphoza, mana nkahenda dambi chinyumecho.”

⁵ Aviha angu ananigomba vii, anauzana, “Andafwa rini yuno dzinare riyalwe?”

⁶ Na hipho edzapho nijambosa nkugomba maneno ga kudzihenda a phamwenga nami, kuno mwakpwe rohoni anakusanya umbeya achituluka aphiye akatangazire anjina.

⁷ Osi achionimena anagomba pokopoko kunihusu ananiazira mai,

⁸ anaamba, “Akagbwirwa ni ukongo mui sana, kandaunuka tsona phakpwe chitandani.”

⁹ Hata msena wangu wa kurya na kuusa nriyemkuluphira yekala huchirya mkpwahe phamwenga, akanigalukira.

¹⁰ Ela nionera mbazi, ee Mwenyezi Mlungu, niphoza, ili nidziriphize chisasi.

¹¹ Nionapho maadui gangu taganiturya ndamanya kukala nkakuhamira.

¹² Ela uwe u uphande wangu kpwa sababu ya ukamilifu wangu nawe unaniika phephi nawe hata kare na kare.

¹³ Naatogolwe Mwenyezi Mlungu, Mlungu wa Iziraeli, hangu kare na kare! Amina na Amina.