Zaburi 40 - Digo Bible

Wira wa kumtogola Mlungu na voyo ra kulonda msada

Kpwa chilongozi wa aimbadzi. Zaburi ya Daudi.

¹ Nágodza Mwenyezi Mlungu aniterye kpwa kuvumirira naye achiniphundza na achisikira chiriro changu.

² Wanituluza kpwenye dibwa ra ubanangi, kula kpwenye matope na uherezi achiniimisa dzulu ya mwamba na achiimarisha nyago zangu.

³ Wanipha wira muphya mwangu kanwani, wira wa kumtogola Mlungu wehu. Anji andaona mahendoge na kuogopha, na kumkuluphira Mwenyezi Mlungu.

⁴ Baha mutu anayemkuluphira Mwenyezi Mlungu; mutu asiyelonda msada kpwa atu a kudzikarya atu agalukao na kuabudu vizuka!

⁵ Uwe Mwenyezi Mlungu, Mlungu wangu mahendogo ga ajabu ni manji, na mambo uhupangirago tagaolangika! Nchiamba nagatangaza na kugasemurira sindaweza kugamala.

⁶ Uwe ukanisodola masikiro na kunihenda nielewe, kukala kuna haja na sadaka za kuochwa wala zawadi zanjina. Kuyalonda sadaka za kuochwa na za kuusira atu dambi.

⁷ Ndipho nchiamba, “Himi nkedza, malagizo utakago nigbwire dza vyoandikpwa kunihusu kpwenye chitabu cha shariya.

⁸ Nalonda nihende ulondavyo, ee Mlungu wangu, shariyayo i mwangu moyoni.”

⁹ Nkatangaza hakiyo kahi za mkpwutano wa atuo, siyafunga mromo wangu, uwe Mwenyezi Mlungu, unamanya.

¹⁰ Sikafwitsa hakiyo mwangu moyoni, nkasemurira uaminifuo na wokofuo, sikafwitsa nyo mkpwutano wa atuo mendzwayo isiyosika.

¹¹ Usikose kunionera mbazi ee Mwenyezi Mlungu mendzwayo isiyosika na uaminifuo naunitundze siku zosi!

¹² Mana nkazungulukpwa ni mashaka gasigoolangika, dambi zangu zikanizidi ni nyinji kuriko isabu ya nyere zangu, nami nkavundzika moyo.

¹³ Hamirwa ni kuniokola ee Mwenyezi Mlungu! Henda wangbwi wedze uniterye ee Mwenyezi Mlungu!

¹⁴ Naagbwirwe ni haya na atatizike, aho alondao kuniolaga. Naauyizwe nyuma na kukoserwa ishima, aho alondao niphahwe ni mai.

¹⁵ Hinyo anaonitseka naangalazwe ni waibu wao.

¹⁶ Ela osi anaokuendza uwe naahererwe na akale na raha kpwa sababuyo. Hinyo amendzao wokofuo, wakati wosi naambe, “Mwenyezi Mlungu ni mkpwulu!”

¹⁷ Mino ni mchiya na mgbwayi, ela Mwenyezi Mlungu ananiririkana. Uwe ndiwe uniteryaye na uniokolaye usikae, ee Mlungu wangu.