Zaburi 39 - Digo Bible

Mwanadamu si chochosi mbere za Mlungu

Kpwa Jeduthuni, chilongozi wa aimbadzi. Zaburi ya Daudi.

¹ Mimi náamba: “Nindamanyirira njira zangu, sedze nikahenda dambi kpwa maneno nigombago. Sindagomba chitu napho atu ayi a phephi nami.”

² Nákala dza bwibwi, sigombere chitu ela siyaphaha baha, mateso gangu gazidi,

³ moyo wangu waaka moho mwangu ndani nirivyozidi kuririkana ndivyo urivyozidi kuaka moho, ndipho nchigomba nchiamba:

⁴ “Ee Mwenyezi Mlungu, nimanyisa mwisho wangu, na isabu ya siku zangu ili nimanye vira maisha gangu garivyo mafupi.

⁵ Lola, ukahenda siku zangu zikale chache muda wa maisha gangu si chochosi kpwako. Kpwa kpweli chila mutu ni dza mseho tu!

⁶ Kpwa kpweli mwanadamu anatsupa dza chivurivuri chadiche chosi ni bure, mana anakusanya mali na kamanya indarisiwa ni ani.”

⁷ Na sambi Mwenyezi Mlungu, ndakuluphira ani mino? Mimi tumaini rangu ni uwe.

⁸ Nitivya na makosa gangu gosi usinihende mutu wa kunyeterwa ni azuzu.

⁹ Nányamala, siyagomba chitu mana uwe ndiwe yegahenda.

¹⁰ Niusira pigoro. Pigo ra mkpwonoo rikaniremweza.

¹¹ Unaphomtiya adabu mutu kpwa kumdemurira kuhusu dambi ukubananga chila amendzacho dza lutswa ribanangavyo, kpwa kpweli mwanadamu ni dza mseho!

¹² “Sikira mavoyo gangu ee Mwenyezi Mlungu, phundza chiriro changu usihurire wakati ninarira mana mimi ni dza mjeni atsupaye, ni mcharo dza arivyokala akare angu.

¹³ Lola kanda ili nkale na raha tsona kabila sidzangbwefwa, nsikaleko tsona.”