Zaburi 36 - Digo Bible

Uyi wa mwanadamu na mendzwa ya Mlungu

Kpwa chilongozi wa aimbadzi. Zaburi ya Daudi, mtumishi wa Mwenyezi Mlungu.

¹ Dambi nkubisha na mutu mui mwakpwe moyoni, mana kamuogopha Mlungu kanago.

² Mui nkudzichenga mwenye iye nkuona uyiwe taundamanyikana na akahukumiwa.

³ Chila agombaro ni iyi na ra handzo; akaricha kuhumira ikima na kuhenda manono.

⁴ Nkupanga mai hata pho phakpwe chitandani gosi akusudiyago ni mai naye kaaza kuricha kuhenda mai.

⁵ Mendzwayo isiyosika ee Mwenyezi Mlungu inafika dzulu mlunguni nao uaminifuo unafika mainguni.

⁶ Hakiyo ni dza myango ya Mlungu, uamulio avi ni vivwa vya bahari uwe Mwenyezi Mlungu unamanyirira atu na nyama.

⁷ Kpwa kpweli mendzwayo isiyosika ni ya samani, ee Mlungu! Anadamu osi nkuchimbirira mwako maphani.

⁸ Ukuamvunisa na unji wa vitu vya mwako nyumbani na kuanwesa kula muho wa manono urigo nago.

⁹ Mana uwe ndiwe chandzo cha uhai wosi naswi hunaona kpwa sababu ya mwangao.

¹⁰ Enderera kuamendza hinyo anaokumanya, na kuativya ario na mioyo swafi.

¹¹ Usiruhusu atu anaodzikarya anivamie wala atu ayi anizole.

¹² Lola atu ayi akagbwa, akabwagbwa photsi taaweza kuunuka.