Zaburi 35 - Digo Bible

Voyo ra kulonda msada

Zaburi ya Daudi.

¹ Ee Mwenyezi Mlungu, apinge hinyo anipingao, pigana nao aho anaopigana nami.

² Hala ngao na chigao unuka wedze uniterye.

³ Gbwira fumo na mkuki chinyume cha anaonizoresa! Iambire nafsi yangu, “Mimi ndimi wokofuo!”

⁴ Hinyo anaolonda kuniolaga naashindwe na agbwirwe ni waibu. Hinyo anaonipangira mai auyize nyuma na aogofyerwe.

⁵ Na akale avi ni wiswa uphepheruswao ni phepho, na malaika wa Mwenyezi Mlungu aazorese!

⁶ Njira yao naikale na jiza na wereza wakati anazolwa ni malaika wa Mwenyezi Mlungu.

⁷ Kpwa kukala anihegera muhego bila sababu na achinitsimbira dibwa bila chausa,

⁸ naangamizwe gafula! Muhego wao nauagbwire enye naagbwe kpwenye dibwa rao enye na aangamie!

⁹ Ndipho nindahererwa mwangu moyoni kpwa sababu ya Mwenyezi Mlungu, ndashangiliya kpwa sababu akanitivya.

¹⁰ Nindamtogola Mwenyezi Mlungu na moyo wangu wosi nimuambe, “Takuna ariye dza uwe, ee Mwenyezi Mlungu! Uwe unativya anyonje kula mikononi mwa enye nguvu, agayi na achiya kula mikononi mwa anao aonera.”

¹¹ Mashaidi a handzo akaniunukira na ananiuza mambo nsigogamanya.

¹² Mino náhendera manono nyo ananiripha na mai, na akaricha roho yangu inasononeka.

¹³ Wakati aho ariphokala akongo, mino naasononekera nádzitesa kpwa kufunga. Mavoyo gangu gariphokosa kujibiwa,

¹⁴ násononeka avi ni msena wangu au mwenehu. Názamisa chitswa changu kpwa sonono dza mutu achiyefwererwa ni nine.

¹⁵ Ela nriphodzikpwala, akusanyika kuno akahererwa, atu ayi nsioamanya adzikusanya chinyume changu, achinikatira bila ya kuricha.

¹⁶ Aenderera kuninyetera na kunikundzira sura kpwa usiru.

¹⁷ Ee Mwenyezi Mlungu, gano undagalola hadi rini? Nitivya na maangamizi gao niokola nsedze nkaolagbwa ni simba!

¹⁸ Ndipho nindakushukuru kahi za kusanyiko kulu ra atuo nindakutogola kahi ya borori kulu ra atu.

¹⁹ Usiriche nkafyorerwa ni aho ario na uadui nami bila ya chausa. Usiriche achionimena bila chausa akafwahirwa.

²⁰ Maneno agombago sigo manono, anagomba maneno mai chinyume cha anatsi asiokondo na mutu.

²¹ Anamaka anaamba: “Aa! Aa! Hukamuona enye na matso gehu!”

²² Ela uwe Mwenyezi Mlungu ukariona dzambo hiro usinyamale ee Mwenyezi Mlungu, usikale kure nami.

²³ Unuka unikanire, Nihehera, ee Mwenyezi Mlungu, Mlungu wangu.

²⁴ Kpwa vira u wa haki ee Mwenyezi Mlungu, amula kukala sina makosa usiriche maadui gangu gakanifyorera.

²⁵ Usiariche akadziamba chimoyo-moyo: Hukaphaha go huchigolonda au aambe: “Hukamkomesa!”

²⁶ Hinyo anifyorerao nfikpwapho ni mai naaphahe waibu na atatizike aho adzikaryao chinyume changu naatiye waibu na aberwe.

²⁷ Ela hinyo ario na hamu ya kuona ikaamulwa sina makosa naahamirwe na apige njerejere siku zosi na aambe: “Mwenyezi Mlungu ni mkpwulu sana! Iye ahamirwaye ni kuongokerwa kpwa mtumishiwe.”

²⁸ Ndipho nindasemurira hakiyo na togozo mutsi wosi.