Zaburi 31 - Digo Bible

Voyo na kulika kpwa kukombolwa kula kpwa maadui

Kpwa chilongozi wa aimbadzi. Zaburi ya Daudi.

¹ Nikakuchimbirira uwe, ee Mwenyezi Mlungu, usiniriche nikagbwirwa ni waibu, niokola kpwa sababu u wa haki.

² Hega sikiro uniphundze, henda wangbwi unitivye, kala mwamba wangu wa kuchimbirira, ngome ya kudina ya kuniokola.

³ Uwe u mwamba wangu na ngome yangu, kpwa ishima ya dzinaro, nilongoza na unionyese njira.

⁴ Ntuluza kpwenye muhego nchiohegerwa mana uwe ndiwe chimbiriro rangu.

⁵ Roho yangu nayiika mwako mikononi, nikombola, ee Mwenyezi Mlungu, Mlungu muaminifu.

⁶ Nikamena hara aabuduo vizuka visivyo na mana ela namkuluphira Mwenyezi Mlungu.

⁷ Nindahererwa na kufwahirwa kpwa sababu ya mendzwayo isiyosika, mana waona mateso gangu na kumanya tabu yokala nayo mwangu rohoni.

⁸ Uwe kunitiire mikononi mwa maadui gangu ela ukaniika phatu phapana.

⁹ Nionera mbazi, ee Mwenyezi Mlungu mana nina shida. Matso gangu tagaonato kpwa sababu ya chiriro mwiri wangu na roho yangu ikaremwa.

¹⁰ Maisha gangu gakasira kpwa sonono na miaka yangu inaphunguka kpwa kuula sina mkpwotse kpwa sababu ya tabu hata mifupha yangu ikakala minyonje.

¹¹ Maadui gangu gananinyetera majirani gangu gananibera. Nikakala utu wa kuogofya kpwa asena angu, achiniona himo njirani ananichimbira.

¹² Chila mmwenga akaniyala, avi nafwa. Nkakala dza nyungu yovundzika.

¹³ Nkasikira maadui gangu gachigomba pokopoko, nami naogofyerwa chila uphande. Aho anapanga njama mbii chinyume changu, njama ya kuniolaga.

¹⁴ Ela nakukuluphira uwe, ee Mwenyezi Mlungu, na ninaamba, “Uwe u Mlungu wangu.”

¹⁵ Maisha gangu ga mwako mikononi, nikombola kula kpwa maadui gangu na hinyo anaonigayisa.

¹⁶ Mlole mtumishio na mbazi nitivya kpwa mendzwayo isiyosika.

¹⁷ Usiniriche nkatiywa waibu, ee Mwenyezi Mlungu, mana nakuvoya uwe. Atu ayi naatiywe waibu naahendwe anyamale ko kuzimu.

¹⁸ Miromo igombayo handzo nainyamazwe, igombayo maneno mai kuhusu atu a haki kpwa shobo na chibero.

¹⁹ Unonoo ni munji na ukaikira hara anaokuogopha. Uwe ukuapha hara anaokuchimbirira, kuno atu osi analola. Kpwa kpweli hinyo anaokuogopha ukaaikira manono teletele, atu osi anamanya kukala u mnono na unaarinda vizuri hinyo anaokuchimbirira.

²⁰ Ukuafwitsa phapho uripho, kure na njama mbii za atu unaaika salama kpwenye makalogo kure na atu anaoashitaki.

²¹ Naatogolwe Mwenyezi Mlungu mana akanionyesa mendzwaye isiyosika kpwa njira ya ajabu wakati kala ni kpwenye mudzi uchiozangirwa kushambuliwa.

²² Mino náogopha nchiamba, “Nikatengbwa kure na Mwenyezi Mlungu.” Ela wasikira chiriro changu nriphokuririra uniterye.

²³ Mmendzeni Mwenyezi Mlungu, mwi atakatifue mosi! Mwenyezi Mlungu nkuarinda atu aaminifu ela nkuatiya adabu kali hinyo anaodzikarya.

²⁴ Dinani chilume na mkale jasiri, mwimwi mosi munaomkuluphira Mwenyezi Mlungu!