Zaburi 25 - Digo Bible

Daudi anamvoya Mlungu amlongoze na amrinde

Zaburi ya Daudi.

¹ Ee Mwenyezi Mlungu nakupha maisha gangu.

² Nakukuluphira uwe, ee Mlungu wangu usiniriche nkagbwirwa ni waibu, usiriche maadui gangu gakahererwa kpwa sababu nkashindwa.

³ Usimriche anayekukuluphira akagbwirwa ni waibu ela aifye osi achengao ayawao bila sababu.

⁴ Nionyesa njirazo, uwe Mwenyezi Mlungu, nifundza kulunga njirazo.

⁵ Nilongoza katika kpweliyo na unifundze mana uwe u Mlungu muokoli wangu, nakukuluphira uwe mutsi wosi.

⁶ Tambukira mbazizo, uwe Mwenyezi Mlungu na mendzwayo isiyosika ambayo wahuonyesa hangu kare.

⁷ Usitambukire dambi zangu na uasi wangu nrigohenda wakati ni barobaro nitambukira kulengana na mendzwayo isiyosika, mana uwe Mwenyezi Mlungu u mnono.

⁸ Kpwa sababu Mwenyezi Mlungu ana haki na ni mnono nkuafundza enye dambi njiraze.

⁹ Iye nkualongoza anaogbwa maguluni kuhenda garigo sawa na kuafundza njiraye.

¹⁰ Njira zosi za Mwenyezi Mlungu ni za mendzwa isiyosika na uaminifu kpwa hinyo agbwirao chilaganeche na malagizoge.

¹¹ Kpwa ajili ya dzinaro, ee Mwenyezi Mlungu niswamehe makosa gangu dzagbwe ni manji.

¹² Chila aogophaye Mwenyezi Mlungu, Mlungu andamfundza njira ya kugbwira.

¹³ Iye andaongokerwa na tsi indakala urisi wa anae.

¹⁴ Mwenyezi Mlungu ni msenangbwa wa hara amuogophao na nkuafundza chilaganeche.

¹⁵ Wakati wosi namlola Mwenyezi Mlungu anisaidiye, mana iye ndiye anitivyaye na mihambo.

¹⁶ Galuka unilole na unionere mbazi mana ni muweche na nagaya.

¹⁷ Huriza tabu za moyo wangu na unitivye na mashaka gangu.

¹⁸ Lola mateso na ziki niphahazo na uniswamehe dambi zangu zosi.

¹⁹ Lola vira maadui gangu garivyo manji na vyo ganimenavyo sana.

²⁰ Rinda maisha gangu, niokola, nkakuluphira uwe kpwa usalama wangu, usiniriche nkagbwirwa ni waibu mana nkakuchimbirira uwe.

²¹ Ukamilifu na uaminifu wangu naunirinde mana nakukuluphira uwe.

²² Ee Mlungu, kombola Aiziraeli, na tabu zao zosi.