Zaburi 24 - Digo Bible

Mfalume mkpwulu

Zaburi ya Daudi.

¹ Dunia na vyosi virivyo mumo ni vya Mwenyezi Mlungu, phamwenga na ulimwengu na atu osi asagalao mumo.

² Mana wachita misingiye dzulu ya bahari na achiidzenga dzulu ya madzi.

³ Ni ani ndiyeambuka mwango wa Mwenyezi Mlungu? Ni ani ndiyeima phatuphe phatakatifu.

⁴ Ni hiye ambaye kahenda mai na ana moyo swafi, ambaye kaabudu vizuka wala kuapa wakati anagomba handzo.

⁵ Mutu iye andaphokera baraka kula kpwa Mwenyezi Mlungu na uamuli wa haki kula kpwa Mlungu ariyemtivya.

⁶ Hivyo ndivyo chirivyo chivyazi cha atu amuendzao Mlungu, atu amuendzao Mlungu wa Jakobo.

⁷ Vugukani mwi maryango, mwimwi maryango ga kare vugukani ili mfalume wa nguma amenye.

⁸ Ye mfalume wa nguma ni ani? Ni Mwenyezi Mlungu ariye na nguvu na uwezo, Mwenyezi Mlungu ariye sujaa wa viha.

⁹ Vugukani mwi maryango, mwimwi maryango ga kare vugukani ili mfalume wa nguma amenye.

¹⁰ Ye mfalume wa nguma ni ani? Ni Mwenyezi Mlungu, Mlungu wa majeshi ndiye mfalume wa nguma.