Zaburi 21 - Digo Bible

Kushukuru kpwa ajili ya ushindi

Kpwa chilongozi wa aimbadzi. Zaburi ya Daudi.

¹ Mfalume anahamirwa kpwa sababu ya nguvuzo, ee Mwenyezi Mlungu naye anashangiliya kpwa sababu ukamupha ushindi!

² Uwe ukamupha higo aazago mwakpwe moyoni wala kukamlafya achigovoya.

³ Wamkaribisha na baraka nono-nono na uchimvwika tadzi ya zahabu swafi phakpwe chitswani.

⁴ Wakuvoya uzima, nawe uchimupha, wamupha siku nyinji za kuishi, kare na kare.

⁵ Ushindi uchiomupha ukamuhenda akale na utukufu mkpwulu ukamjaliya nguma na ishima.

⁶ Kpwa kpweli ukamuhenda akale mutu yejaliwa hata kare na kare ukamuhenda ahererwe na raha ya kukala phamwenga na uwe.

⁷ Mana mfalume nkumkuluphira Mwenyezi Mlungu na kpwa sababu ya mendzwa isiyosika ya Iye Ariye Dzulu Kuriko Vyosi, kandakakamiswa ni utu.

⁸ Mfalume andaagbwira avihae osi na mkpwonowe wa kulume undagbwira osi anaommena.

⁹ Hipho ndiphotsembuka andaangamiza dza moho mkali. Mwenyezi Mlungu andaangamiza kpwa tsukizize na moho undaocha tsetsetse!

¹⁰ Andaangamiza chivyazi chao duniani, ana aho taandasala kahi za anadamu.

¹¹ Dzagbwe nkukupangira mai, taandafwaulu.

¹² Mana andaahenda azole, miviye ndiphoalenga usoni.

¹³ Unulwa, ee Mwenyezi Mlungu kahi ya nguvuzo! Hundaimba na kutogola uwezoo.