Zaburi 19 - Digo Bible

Nguma ya Mlungu kahi za viumbe

Kpwa chilongozi wa aimbadzi. Zaburi ya Daudi.

¹ Ko mlunguni kunatangaza utukufu wa Mlungu na dzulu kunaonyesa kazi ya mikonoye.

² Siku bada ya siku nkpwenderera kusemurira, na usiku bada ya usiku kumuhenda amanyikane.

³ Kunasemurira bila ya kulavya kauli na rakare tarisikirika.

⁴ Ela rakare rikagota dunia ndzima, na maneno gao gakafika mwisho wa dunia. Mlungu akachitira dzuwa hema kuko mlunguni,

⁵ naro nkutuluka dza bwana arusi kula kpwakpwe chumbani, dza mutu ashindanaye mairo ahamirwavyo kuzola kpwenye njiraye.

⁶ Nkutuluka kula mwisho wa mlungu, rikazunguluka hadi mwisho wanjina, na taphana chitu chinachoweza kudzifwitsa dzohore.

Shariya ya Mwenyezi Mlungu

⁷ Shariya ya Mwenyezi Mlungu taina ila, nkumupha mutu nguvu uphya, malagizo ga Mwenyezi Mlungu ganakuluphirika nkumupha ikima mutu asiyekalanayo.

⁸ Shariya za Mwenyezi Mlungu zi sawa, nkuhenda moyo ukahererwa. Malagizo ga Mwenyezi Mlungu ni ga haki, nkumvugula mutu matso.

⁹ Kumuogopha Mwenyezi Mlungu ni kunono na kunaenderera hata kare na kare. Malagizo ga Mwenyezi Mlungu ni ga kpweli na gosi ni ga haki.

¹⁰ Gago ganatamanika kuriko zahabu, tsona zahabu iriyoswafi zaidi. I mtswano kushinda asali itwenayo kula phalalani.

¹¹ Mtumishio nkuonywa na gago na achigagbwira anaphaha tuzo kulu.

¹² Ni ani awezaye kuona makosage? Niswamehe makosa ga siri.

¹³ Mrinde mtumishio asikale na makosa ga kusudi, usigariche gakanitawala nami ndakala sina lawama, sindaisabiwa kukala nina makosa makulu.

¹⁴ Maneno nigombago na maazo ga mwangu moyoni nagakubalike phako matsoni, Ee Mwenyezi Mlungu, mwamba wangu na mkomboli wangu.