Zaburi 17 - Digo Bible

Voyo ra mutu asiye na makosa

Voyo ra Daudi.

¹ Ee Mwenyezi Mlungu sikira chiriro changu cha kulonda nihenderwe haki! Sikiza mavoyo gangu nivoyago kpwa roho swafi.

² Uwe ndiwe uniphaye haki mana unamanya irivyo sawa.

³ Uwe ukanedzera usiku, ukanichunguza ukakuta sina uyi wowosi, mana nkaamuwa kusahenda dambi na kanwa yangu.

⁴ Nikalunga malagizogo, ambago gananihenda nisilunge njira za atu a fujo.

⁵ Mimi nkulunga njirayo nami sidzangbweitelephuta.

⁶ Ninakuvoya uwe Mlungu kpwa sababu undanijibu, hega sikiroro, usikire voyo rangu.

⁷ Onyesa mendzwayo isiyosika kpwa njira ya ajabu uwe uokolaye atu kula kpwa aviha aho uwe utivyaye na mkpwonoo wa kulume, atu anaokuchimbirira.

⁸ Nirinda dza vira urindavyo tembe ya dzitsoro nifwitsa mwako maphani

⁹ sedze atu ayi akanishambuliya na maadui gachigonizangira gakaniolaga.

¹⁰ Taanionera mbazi tsona anagomba maneno ga kudzikarya.

¹¹ Akaniindza na vino ananizunguluka chila uphande anaendza nafwasi anibwage.

¹² Akakala avi ni simba mwenye ndzala, a tayari kunimwamula-mwamula dza mwana simba chiyedzifwitsa na kuoteya.

¹³ Unuka Mwenyezi Mlungu! Pingana nao uashinde! Nitivya na atu ayi kpwa upangao.

¹⁴ Mwenyezi Mlungu nitivya na hinyo ambao hipha sambi ana chila chitu alondacho. Atiye adabu na mateso urigoapangira, na ana aho aphahe zaidi ya higo, na ganjina gasazwe kpwa ajili ya adzukulu ao.

¹⁵ Ela kpwa vira ni mwenye haki, nindaona usoo. Ndipholamuka ndahererwa kukuona.