Zaburi 149 - Digo Bible

Wira wa kumtogola Mlungu

¹ Haleluya. Mwenyezi Mlungu naatogolwe! Muimbireni Mwenyezi Mlungu wira muphya, wa kumtogola kahi za mkpwutano wa atu aaminifu.

² Aiziraeli naahererwe kpwa sababu ya Muumba wao, atu a Sayuni naahamirwe ni mfalume wao!

³ Naalike dzinare kuno anafwiha, naamupigire tamburini na zeze.

⁴ Mana Mwenyezi Mlungu nkuhamirwa ni atue, naye nkuapha anyenyekevu ushindi.

⁵ Hinyo aaminifu naakale na raha kpwa sababu ya unonowe, naaimbe kpwa kufwahirwa mwao vitandani.

⁶ Naakale atu akumtogola Mlungu kuno panga zao zenye maso kosi-kosi zi mwao mikononi.

⁷ Tayari kuriphiza atu a mataifa ganjina, kuatiya adabu atu a go mataifa.

⁸ Kuafunga afalume aho na silisili na kuatiya pingu vilongozi,

⁹ ili aphahe kutiywa adabu kama arivyopangirwa! Higo ndigo manono arigopangirwa atu aaminifue osi. Haleluya. Mwenyezi Mlungu naatogolwe!