Zaburi 144 - Digo Bible

Mfalume anashukuru Mlungu kpwa ushindi

Zaburi ya Daudi.

¹ Naatogolwe Mwenyezi Mlungu, mwamba wangu, iye aifundzaye mikono yangu na mala gangu kupigana viha.

² Iye ni mwamba wangu na ngome yangu ngome yangu ya kudina na mkomboli wangu ngao yangu na chimbiriro rangu ndiye ashindaye mataifa na kugaika tsini yangu.

³ Ee Mwenyezi Mlungu, mutu ni utu wani hata umujali ama mwanadamu ni utu wani hata umuririkane?

⁴ Mutu ni dza mseho bahi sikuze avi ni chivurivuri chitsupacho.

⁵ Wesa ko kpwako mlunguni ee Mwenyezi Mlungu, wedze photsi! Guta myango, ifuke mosi!

⁶ Ngʼaza limeme uatsamule, jeza miviyo, uazorese.

⁷ Golosa mkpwonoo kula dzulu, unitivye na unituluze kula higa madzi manji, na kula mikononi mwa ajeni,

⁸ ambao kanwa zao nkugomba handzo, na ambao mikono yao ya kulume nkulavya ushaidi wa handzo.

⁹ Ndakuimbira wira muphya ee Mwenyezi Mlungu, ndawiimba kuno napiga ngephephe.

¹⁰ Uwe uaphaye afalume ushindi, umtivyaye Daudi mtumishio kula kpwa upanga mkali.

¹¹ Nitivya na unikombole kula mikononi mwa ajeni, ambao kanwa zao zi tele handzo, aunulao mikono yao ya kulume na kulavya ushaidi wa handzo.

¹² Ana ehu a chilume na aajaliwe katika uvulana wao akule dza mimea ikulayo ikaphera, na ana ehu a chichetu akale dza nguzo za pembeni chizokatwa vinono ili kudzengera dzumba ra mfalume.

¹³ Vitsaga vyehu naviodzale vyakurya vya chila aina, mangʼondzi gehu gavyale maelufu na maelufu mwehu mindani,

¹⁴ ngʼombe zehu zitsukule mizigo miziho chiyovunwa. Husivamiywe ni adui na kuvundzirwa kuta zehu, husitsamizwe kpwa lazima wala husikale na chiriro cha sonono!

¹⁵ Ana raha hinyo ndiojaliwa na mambo dza higa! Ana raha hinyo ambao Mlungu wao ni Mwenyezi Mlungu!