Zaburi 141 - Digo Bible

Kuvoya kurindwa na atu ayi

Zaburi ya Daudi.

¹ Ee Mwenyezi Mlungu nakuiha, henda wangbwi wedze. Niphundza wakati ninakuiha.

² Mavoyo gangu nagakale dza uvumba mberezo, na nikuunurirapho mikono yangu, nikubali dza ukubalivyo sadaka ya dziloni!

³ Rinda kanwa yangu, ee Mwenyezi Mlungu, rinda madomo gangu.

⁴ Usiriche moyo wangu ukaaza mai sedze nikahenda mambo mai, phamwenga na atu ahendao mai, wala kurya vyakurya vya sharee zao.

⁵ Mwenye haki achinipiga au achinidemurira indakala ni dza mafuha mwangu chitswani. Chitswa changu tachindarema. Kpwa kpweli sindaricha kuvoya kuhusu uyi wao.

⁶ Wakati atu ayi ndipholaviwa kpwa hinyo ndioaamula, phapho andadzifundza kukala neno ra Mwenyezi Mlungu kala ni ra kpweli.

⁷ Aho andaamba, “Dza viratu mutu arimavyo na kubumbundisa madongolowa, vivyo ndivyo mifupha yehu phenye mryango wa mbira.”

⁸ Ela matso gangu ganakulola uwe Mwenyezi Mlungu, Mlungu wangu. Ninakuvoya unirinde, usiniriche niolagbwe.

⁹ Nirinda na mihego achiyonihegera, niika kure na mihego ya atu ayi.

¹⁰ Richa nyo atu ayi agbwirwe ni vyo vimia vyao, kuno natsupa salama.