Zaburi 137 - Digo Bible

Wira wa sonono kahi za tsi ya chijeni

¹ Hwasagala kanda ya myuho ya Babeli, hwasagala na huchirira huriphotambukira Sayuni.

² Ngoma zehu za ngephephe huchizitsomeka mihini phapho hipho.

³ Mana ariokala akahugbwira alonda huaimbire, nao ariokala anahugayisa aamba, “Huimbireni wira mmwenga wa mawira ga Sayuni!”

⁴ Hundaimbadze wira wa Mwenyezi Mlungu na kuno hu kahi ya tsi ya chijeni?

⁵ Ichikala ndakuyala uwe Jerusalemu phahi mkpwono wangu wa kulume nauswene.

⁶ Lilimi rangu narigbwirane na lilakalaka, napho sindakutambukira uwe, napho sindakuririkana uwe Jerusalemu, kuriko chochosi chinachonifwahira.

⁷ Ee Mwenyezi Mlungu usiyale vira Aedomu arivyohenda siku Jerusalemu iriphohalwa mateka, hinyo aamba, “Ibomoleni, ibomoleni hata misingiye!”

⁸ Mwi atu a Babeli, mʼbanangadzi mkpwulu we! Baha hiye ndiyekuriphiza go mai urigohuhendera!

⁹ Baha hiye ndiyehala anao na aabande-bande maweni!