Zaburi 132 - Digo Bible

Makalo ga Mwenyezi Mlungu

Wira wa kuambukira mwango Sayuni shareeni.

¹ Ee Mwenyezi Mlungu mtambukire Daudi na tabu zosi arizokala nazo.

² Tambukira arivyoapa, ee Mwenyezi Mlungu naziri ariyokuikira uwe Mwenye Nguvu wa Jakobo.

³ Iye waamba, “Sindamenya mwangu nyumbani wala kupanda mwangu chitandani,

⁴ sindakubali kulala usingizi wala kusenukira,

⁵ hadi ndiphomphahira phatu Mwenyezi Mlungu ndiphomphahira makalo iye Mwenye Nguvu wa Jakobo.”

⁶ Swino hwasikira habari kuhusu Sanduku ra Chilagane huriphokala Efuratha, chisha huchendariphaha kahi ya minda hiko Jaari.

⁷ “Huphiyeni kpwenye makaloge, huphiyeni hukaabudu, kpwenye chihiche cha kuikira magulu.”

⁸ Unuka, uwe Mwenyezi Mlungu, uphiye ukamenye pho phatupho pha kuoya, uwe phamwenga na ro sanduku ra nguvuzo.

⁹ Alavyadzio-sadaka naahende haki wakati wosi na aaminifuo, naapige njerejere na raha.

¹⁰ Na kpwa ajili ya Daudi, mtumishio, usimreme ye mtumishio yemmwagira mafuha.

¹¹ Mwenyezi Mlungu wamuapira Daudi chirapho cha uhakika ambacho ni achitimize, “Nindaika mmwenga wa chivyazicho mwenye, kpwenye chihicho cha endzi.

¹² Ichikala chivyazicho andagbwira chilagane changu na kulunga malagizo gangu ndigoafundza, ana aho nao andakala afalume hata kare na kare.”

¹³ Mana Mwenyezi Mlungu akatsambula Sayuni phakale makaloge:

¹⁴ “Phapha ndipho phatu phangu pha kuoya hata kare na kare mino ndasagala phapha mana nkaphamendza.

¹⁵ Nindajaliya Sayuni kpwa kuupha mahitajige na agayie ndaamvunisa.

¹⁶ Alavyadzie-sadaka ndaavwika wokofu, na aaminifu ario himo andakala achiimba kpwa raha.

¹⁷ Nindaunula mutu wa chivyazi cha Daudi akale mfalume himo, nkatayarisha taa kpwa ajili ya mmwagirwa mafuha wangu.

¹⁸ Ndatiya waibu maaduige ela ndamvwika tadzi ya chifalume imekayo siku zosi.”