Zaburi 130 - Digo Bible

Kuvoya kuterywa

Wira wa kuambukira mwango Sayuni shareeni.

¹ Mwenyezi Mlungu, nakuririra uwe wakati nkavundzika moyo.

² Mwenyezi Mlungu phundza sauti yangu! Masikirogo nagasikize vinono mavoyo gangu!

³ Ee Mwenyezi Mlungu, ichikala uwe undaolanga makosa gehu, ni ani ndiyeweza kuima mberezo?

⁴ Ela kpwako kuna msamaha ili huphahe kukuogopha.

⁵ Namgodzera Mwenyezi Mlungu, moyo wangu unagodzera, matumaini gangu ni kpwenye nenore.

⁶ Nagodzera Mwenyezi Mlungu, zaidi ya vira arindzi a usiku agodzeravyo kuche, ehe, ni zaidi ya vira arindzi a usiku agodzeravyo aone kukacha.

⁷ Uwe Iziraeli mkuluphire Mwenyezi Mlungu, mana Mwenyezi Mlungu ana mendzwa isiyosika, tsona iye ana nguvu nyinji za kukombola.

⁸ Iye andakombola Iziraeli na dambize zosi.