Zaburi 122 - Digo Bible

Nguma za Jerusalemu

Wira wa kuambukira mwango Sayuni shareeni. Wira wa Daudi.

¹ Nahamirwa ariphoniamba, “Huphiye nyumbani mwa Mwenyezi Mlungu.”

² Vivi huimire mwako maryangoni, uwe Jerusalemu.

³ Jerusalemu ni mudzi uchiodzengbwa vinono na kutaze zikagbwirana ngingingi.

⁴ Hiko ndiko ambako mbari nkuambuka mbari za Mwenyezi Mlungu kpwendatogola dzina ra Mwenyezi Mlungu kulengana na shariya zohewa Iziraeli.

⁵ Hiko ndiko kuriko na vihi vya uamuli vihi vya utawala vya chivyazi cha Daudi.

⁶ Voyerani Jerusalemu ikale na amani: “Hinyo anaokumendza na akale salama!

⁷ Namukale na amani ndani ya kutazo, na usalama ndani ya madzumbago.”

⁸ Kpwa ajili ya enehu na asena angu, nindaamba, “Kalani na amani.”

⁹ Kpwa ajili ya nyumba ya Mwenyezi Mlungu, Mlungu wehu, nindakuvoyera uongokerwe.